2011

Lennie-isminn varð U21 árs liðinu að falli

2011-06-15T19:19:00.004+01:00

Útlitið er svart hjá okkar mönnum í U21 árs landsliðinu á EM í Danmörku. Þessum öflugu strákum er vorkunn enda hafa síðustu mánuðir hérlendis verið undirlagðir af þátttöku liðsins á mótinu og oftar en ekki var liðið kallað ,,litlu strákarnir okkar.“

Tveir leikir, ekkert mark og Ísland hefur fengið á sig fjögur mörk. Framundan er hið ómögulega, að vinna Dani með þriggja marka mun. U21 árs landsliðinu er vorkunn því óeðlilegar væntingar til A-landsliðsins og þau vonbrigði sem jafnan fylgja því að horfa á það lið leika knattspyrnu gerðu það að verkum að þjóðin skaut U21 árs liðinu upp á sinn hæsta stall.

Fallið var hátt, lendingin ekki endanlega komin en hún verður vafalítið hörð. Ungir menn takast þá á við vonbrigði heillar þjóðar sem batt óraunhæfar vonir við getu þeirra. Vera þeirra á mótinu er stærsti sigurinn, vissulega vildu allir sjá betri árangur en mistökin lágu hjá landanum og aðallega sterkum styrktaraðilum U21 árs liðsins og fjölmiðlum.

Við verðum að hætta þessum Lennie-isma. Lennie, persóna í bókinni Of Mice and Men, átti það til að kæfa fólk... til bana. Af ástríðunni einni saman og án vitneskju um eigin styrk batt hann enda á nokkur líf, ómeðvitaður um afleiðingar gjörða sinna.

Fjölmiðlar, stærsta og gagnrýnislausasta klappstýra liðsins, og styrktaraðilar þess blésu væntingarnar upp úr öllu valdi. Ísland í fyrsta sinn í karlaflokki á stórmóti, litlu strákarnir okkar, Pétur Marteins og aðrar valdar kempur að reyna að komast í liðið, bankaleg auglýsingaherferð skömmu fyrir mót með þyrluskotnum myndbrotum og Íslandsvæðing í nærumhverfi leikvangsins þar sem Ísland leikur í Danmörku í boði Valitor eða Borgunar eða hvað það nú var. Þetta og fleira var hluti af uppblæstrinum á liðinu svo ekki sé nú minnst á Vormenn Íslands hjá RÚV.

Við fórum langt fram úr okkur, við vorum orðin kolrangstæð í umfjöllun okkar um liðið einhvern tíman um síðustu jól. Væntingar frá Íslandi inn á jafn sterkt mót og strákarnir eru staddir á eiga að vera við algert frostmark, við getum ekkert leyft okkur að vera með höfuðið í skýjunum. Það er óraunhæft og ósmekklegt að leggja þessi þyngsli á 21 árs gamla íþróttamenn og yngri.

Styðjum strákana til sigurs í stað þess að reisa skýjaborgir. Fjölmiðlar ættu að gyrða í buxurnar í þessum efnum og gerast málefnanlegri í stað þess ganga með grasið í skónum á eftir þessum ungu og efnilegu Vormönnum Íslands.

Íslands þúsund ár
verði gróandi þjóðlíf með þverrandi tár,
sem þroskast á guðsríkis braut.

JB

Verkfall?

2011-06-15T18:51:00.002+01:00

Flugvirkjarnir eru að boða verkfall þann 20. júní. Þá vill einmitt svo vel til að ÍF heldur af stað til Grikklands með rúmlega 50 manna hóp til þess að taka þátt í Alþjóðaleikum Special Olympics.

Sjáum hvað setur.

JB

Þrífættur Sigmundur á flótta

2010-10-01T16:45:00.002+01:00

Hraustleg mótmæli við Austurvöll í dag og sjálfsagt munu fréttatímar kvöldsins verða undirlagðir af mótmælaklippum. Í dag hoppaði maður á milli miðla og fylgdist með því hvernig þingmenn gösluðu sér á milli kirkju og þings við setningarathöfnina.

Eggjum rigndi sem og hús- og bíllyklum, táknræn skilaboð með lyklana enda yfirvöld búin að gefa það út með verkum sínum að þau ætli sér ekki að verja neina velferð, aðeins fjármagnseigendur.

Í þessu fréttaflóði af mótmælunum í dag rakst ég á skemmtilega mynd hjá DV. Svo virðist sem þingsflokksformaður Framsóknar, Sigmundur Davíð, sé snar í snúningum, svo snar að linsa ljósmyndara DV merkti þrjá fætur á hlaupum hjá kappanum!

JB

Eiki drekinn

2010-09-28T16:32:00.004+01:00

Eiríkur Jónsson rekinn af Séð og Heyrt í dag, Svanur Már Snorrason tekur við sem ritstjóri. Viðbrögð Eiríks við spurningum blaðamanna frá öðrum miðlum um ástæður uppsagnarinnar voru: „No Comment“

Ef Séð og Heyrt á að standa undir nafni verður Svanur að kasta öllu klabbinu fram í dagsljósið, svæsnu söguna á bakvið brottreksturinn og vafalítið hefur Björn Blöndal verið á staðnum til að ná paparazzi-pic af Eiríki storma út af skrifstofunni. Vænti þess að Se og hör greini ítarlega frá þessu máli - annað væri scandalous!

JB

Sigurður Baltasar

2010-09-27T15:49:00.002+01:00

Þá er nýjasti fjölskyldumeðlimurinn búinn að fá nafn. Emmi bróðir Hilmu var að skíra um helgina, Sigurður Baltasar var drengurinn skírður. Undirritaður mundaði að sjálfsögðu myndavélina í kirkjunni.

JB

Golfið á hilluna... hvað skal gera við tímann?

2010-09-23T11:15:00.003+01:00

Veiðisumrinu 2010 er lokið! Handfylli af löxum á land, þokkalegt bara sé tekið mið af fáum veiðidögum en úr því verður rækilega bætt næsta sumar og þegar er búið að festa eina helgarveiði 2011. Eftir því sem aldurinn færist yfir sér maður betur og betur hvar sterku hliðarnar liggja og hvar veiku punktarnir eru, í því ljósi hef ég ákveðið að leggja golfsettið alfarið á hilluna.

Eftir slælega frammistöðu á Spáni og miður gott lundarfar í kjölfarið var þessi ákvörðun tekin, ekki meira golf fyrr en í ellinni. Maður kemur aldrei fýldur frá árbakkanum svo það verður stangveiðin sem tekur nú við.

Þá er bara að hefjast handa og ráðstafa öllum tímanum sem fellur til við að segja skilið við golfið því þetta sport er viðbjóðslega tímafrekt. Hvað tekur þá við? Ekki getur maður staðið úti í á öllum stundum þó það væri óskandi enda kostar það lunga og lifur að veiða hérna.

Hugmyndir til að kanna við tíma sem losnar við stöðvun golfiðkunar:

-Heimildarmynd um spillingu á Íslandi (festa cameru fyrir framan Alþingishúsið).
-Bókarskrif um siðgæðisvitund íslenskra presta.
-Ljósmyndabók um andstæður á Íslandi (forsíðumynd af Jóni Gnarr í borgarstjórastól).
-Skilja af hverju við getum framleitt mannlausa kafbáta en ekki rafmagnsbíla.
-Komast að því hvaða Suðurnesjamaður lagði Jónas eiturpenna Kristjánsson í einelti.
-Finna lykilinn að póstkassanum mínum.
-Uppgötva genið sem veldur einhverfu-enskubolta áhrifunum. (Leit hefst á íþróttmiðlum landsins).
-Splæsa saman DNA þráðum úr Andra Snæ og Tryggva Þór Herbertssyni, kanna útkomuna.
-Athuga hvort Karfan.is geti fengið ríkisábyrgð.
-Kanna hvort það sé öruggara að fá borgað svart og eyða peningunum í vændiskonur og eiturlyf heldur en að bramboltast við að vera gildur þjóðfélagsþegn í Íslandi nútímans.

JB

Ricky Gervais... snillingur

2010-09-10T15:35:00.003+01:00

Í heimi þar sem allir kunna bara að segja sannleikann... er lygarinn konungur! Tók á leigu í gær The Invention of lying með Ricky Gervais í aðalhlutverki. Kallinn er vitaskuld fátt annað en snillingur og myndin vissulega fín en kannski fjarri hans bestu mómentum sem eru m.a. þessi:

Still vs. Sparkling:
http://www.youtube.com/watch?v=lugUd7fIx8Q

Og svo þessi one-læner hérna sem er svakalegur:
http://www.youtube.com/watch?v=3rHPzzXN3cs&feature=related

Laxlaus úr Hallá

2010-09-07T12:12:00.003+01:00

Með öngulinn í rassinum í annað sinn og það í jafn mörgum veiðiferðum! Nú er maður stórlega farinn að efast um eigið ágæti í laxveiðinni. Ég sem er búinn að fleygja golfsettinu til að einbeita mér að laxveiðinni og fæ ekki fisk.

Ég var við veiðar í Hallá við Skagaströnd í gærdag og það kom ekki branda á land. Hallá er reyndar ekki sú ákjósanlegasta fyrir laxinn enda erfið yfirferðar fyrir bæði fisk og menn en þarna hafa komið um 100 laxar í sumar og 95% þeirra á maðk.

Sjálfur var ég skeinuhættur ,,buffari" með maðkinn en hef nú lagt honum á hilluna enda tvennt ólíkt að fá flugulax á einhendu eða maðkalax á kaststöng.

Þá er það Alviðra í Soginu sem er næst á dagskrá þann 18. september, sá silfraði fær engin grið þann daginn.

JB

Vandað orðfæri opinberra starfsmanna...

2010-09-02T14:01:00.005+01:00

...„Segðu svo frænda þínum að hoppa upp í rassgatið á sér!“

Þetta var dýrasta setningin í íslenskum fjölmiðlum í gær en síðasta setning sem var svona eftirminnileg og í dýrari kantinum var þessi:

„Það eru svona um það bil 5% af þjóðinni fábjánar. Það er miklu meira en 1100."
Þráinn Bertelsson í viðtali á Bylgjunni í mars 2010. (Og nafni hans Þráinn tæknimaður augljóslega allt annað en sáttur við gestinn í hljóðveri :)

Ætli viðlíka eftirmæli og þau sem höfð eru um Jón Sigurðsson forseta verði látin falla um það fólk sem á heiðurinn að svona orðfæri eins og línurnar hér að ofan bera vitni um?

Eftirmæli Íslendinga í Kaupmannahöfn um Jón Sigurðsson, letruð á silfursveig á kistu hans: „Óskabarn Íslands, sómi þess, sverð og skjöldur.“

Í upphafi skal endinn skoða!

JB

Krankleikinn ágerist!

2010-09-01T10:48:00.001+01:00

Nú liggur fyrir pöntun í Affallið 12. og 13. ágúst 2011. Þessu veiðitímabili er enn ekki lokið og maður hefur þegar fest sér veiðidaga á næsta tímabili.

Krankleikinn ágerist...

JB

Luigi´s kitchen strikes agin

2010-08-30T14:58:00.003+01:00

Eftir langa fundarsetu í Kaupmannahöfn um helgina var farin heimsókn í Luigi´s kitchen á Læssögesgade. Flatbaka að hætti meistarans og svo sumbl fram eftir nóttu. Perfecto eins og Luigi sjálfur myndi segja.

Til að toppa þetta var hoppað á kokteilbar hverfisins... þá ber að varst líkt og heitan eldinn. Héðan í frá drekk ég aðeins rauðvín :)

Hér með staðfestist það svo að flatbökur eru og verða alltaf bestar heimabakaðar!

Takk fyrir mig Luigi og frú

JB

Af ensku og ekki ensku

2010-08-26T22:53:00.005+01:00

Við erum með forsætisráðherra sem talar ekki ensku og landbúnaðar- og sjávarútvegsráðherra sem skilur ekki ensku en talar hana samt.

http://www.channel4.com/news/articles/politics/international_politics/iceland+minister+aposour+rightapos+to+fish+mackerel/3754777

Er það nokkur furða að umheiminum sé farið að verða í nöp við okkur?

JB

Sit sem fastast

2010-08-24T18:00:00.002+01:00

Þessa dagana keppist fólk við að skrá sig úr Þjóðkirkjunni. Síðustu tíðindi af klerkastéttinni okkar eiga þar stóran hlut að máli en sjálfur mun ég sitja sem fastast innan kirkjunnar.

Það er ástæðulaust að snúa baki við almættinu þó nokkrir syndaselir hafi verið teknir á teppið.

JB

Annar í brúðkaupsferð

2010-08-23T15:19:00.003+01:00

Breiðafjörður, botnlaus matarkista sem við hjónin biðum spennt eftir að uppgötva í annarri brúðkaupsferð okkar. Ferðina fengum við í brúðargjöf frá foreldrum mínum 2007 þegar við giftum okkur og leystum hana út nú í sumar.

Spæling! Vont í sjóinn og við komumst ekki út í Flatey eins og til stóð, fórum aðeins út í Skáleyjar sem var flott en skipperinn á trillunni vildi ekki út í Flatey. Hvorugt okkar hefur komið þangað og eyjan því verri fyrir vikið frá mínum bæjardyrum séð.

Í heild var ferðin mögnuð, við rifum meðalaldurinn niður í 75 ár en skemmtum okkur engu að síður konunglega enda magnað umhverfi vestra. Svo komumst við í einstakt návígi við Haförn sem sveimaði um 15-20 metra fyrir ofan okkur, fundum hreiðrið hans en hættum okkur ekki nærri með Hafarnarmömmuna í vígahug fyrir ofan.

Bændurnir á Stað í Reykhólasveit fá svo þakkir og hrós frá okkur hjónum en þau ráku augun í það augljósa... adrenalínið flæddi ekki beint í stríðum straumum í ferðinni. Þetta sáu bændurnir og buðu okkur fjórhjólin á bænum til afnota þegar gamalmennin höfðu haldið í Bjarkarlund til hvílu. Mögnuð upplifun og hjóluðum við þarna um túnin á Stað og áðum við fossasprænu í fjallinu ofan við bæinn.

Stórkostlegt ferðalag í alla staði og mæli ég sterklega með því að fólk fari sem oftast í second, third og fourth brúðkaupsferðir og jafnvel fleiri. Þá er sveitabærinn Staður í Reykhólasveit vel þess virði að heimsækja!

JB

Þorði ekki að biðja um áritun

2010-08-17T11:03:00.003+01:00

Í sumarfríinu okkar á Spáni héldum við einn daginn niður á strönd. Þar sem ég lá í makindum mínum upptekinn við að tana jafnt varð mér litið í flæðarmálið. Hlýr gustur lá af sjónum, heiðskýr himinn og mér leið notalega á strandhandklæðinu uns ég sá hvar þekkt mannvera gekk hjá.

Þó enginn í sjónmáli væri í vanda staddur var þarna kominn holdi klæddur sjálfur David Hasselhoff, frægasti Þjóðverji mannkynssögunnar!

Sem fyrrum blaðamaður varð ég að smella af einni mynd en ég þorði ekki fyrir mitt litla líf að biðja goðið um eiginhandaráritun.

JB

Viðskiptahugmynd frá Spáni

2010-08-15T15:34:00.003+01:00

Þá er Skipholtsfjölskyldan mætt aftur á Klakann eftir 12 góða daga í sólinni á Spáni. Get ekki sagt að undirritaður sé hel-tanaður en eitthvað þó, var duglegur að maka á mig sólarvörninni svo gula kvikyndið næði nú ekki að skemma sumarfríið mitt.

Við vorum á Orihuela Costa sem er rétt hjá Torrevieja (Spánarfróðir beðnir velvirðingar ef þetta er ekki skrifað rétt). Nánar tiltekið vorum við í hverfi sem heitir Lomas de Cabo Roig, skemmtilegur staður, í það minnsta fínt að vera með börn á þessu svæði.

Annars var þetta 30+°C alla daga og vitanlega var kíkt á nærliggjandi golfvelli - með miður góðum árangri. Annað hvort skekktust kylfurnar mínar í fluginu eða vellirnir á Spáni eru nokkuð erfiðari en þessir hér heima, skal ekki segja.

Kom með viðskiptahugmynd heim til Íslands frá Spáni - umboðsaðilar ættu að senda línu þarna út til Spánar og tryggja sér umboðið á Laranja sóda-drykkjunum, hin fínasta svölun. Fyrir vikið vil ég aðeins kassa af límónu- og appelsínu bragðtegundunum í toll (ekki dýrt sé tekið mið af því að ég hafi fundið vandaða vöru úr öðru en íslensku drykkjarvatni).

JB

5 pundari í Affallinu

2010-07-29T15:34:00.002+01:00

Jæja, það hafðist einn silfraður upp úr Affallinu í gær, fimm punda merktur hængur. Fer svo í pott merktra fiska og get unnið einhver verðlaun þegar dregið verður... krossa puttana upp á veiðileyfi : )

Alls voru þetta 6 laxar í hollinu í gær... ekki slæmt það.

JB

Affallið á miðvikudag

2010-07-26T23:27:00.002+01:00

Þá er komið að því, veiði í Affallinu eldsnemma á miðvikudagsmorgun og strákurinn fer græjaður frá toppi til táar. Þakka ykkur öllum kærlega fyrir ruuusalegu afmælisgjafirnar, Busi frændi og fjölskylda gáfu mér tvíhendu, ma and pa með tvíhenduhjól, amma Halla og Hildur frænka mættu með línuna, Pía kom með háfinn, Ásdís gleraugun og hjólatösku, Hilmz með veiðitöskuna, Eyja með flugurnar og bara allt að gerast. Tengdó með undirgallann og Tristann með rotarann... klappaður og klár. Affall - here I come.

ps. ástarþakkir fyrir mig í þessari mögnuðu afmælisviku.

JB

Hrærður bara...

2010-07-21T23:12:00.002+01:00

Strákurinn orðinn þrítugur... frá og með 19. júlí síðastliðnum. Aldeilis aldurinn á manni. Vorum síðsutu daga í Álftavíkinni, tær snilld í rjómablíðu og ekki laust við að maður hafi tekið smá lit.

Á sjálfan afmælisdaginn var farið Við Fjöruborðið á Stokkseyri með mömmu, pabba, Ásdísi systur, tengdaforeldrunum og Tristani Marra. Öflugur hópur hér á ferðinni sem átti góða kvöldstund. Þarna bættist í gjafaflóruna og ekkert smáræði á ferðinni, við erum að tala um veiðitösku, rotara, galla, gleraugu, tvíhenduhjól, nýr og ferskur JB bolur (fatalína á leiðinni). Strákurinn hreinlega baðaður í gjöfum, hrærður.

JB

One of a kind

2010-07-16T14:33:00.003+01:00

Fyrsta afmælisgjöfin er komin í hús, fékk þessa forlátu lopapeysu að gjöf frá vini mínum Tomaszi Kolodziejski. Kærasta hans Magda og tengdamóðir hans hafa víst setið sveittar síðustu misserin við að búa til þessa einstöku lopapeysu sem sannarlega er one of a kind.

Maður verður aldeilis reffilegur á körfuboltaleikjunum í vetur í þessu meistarastykki en það gæti hitnað verulega í kolunum... þó vel þess virði þegar maður skartar svona öndvegisflík.

Annars er stóri dagurinn á mánudag, strákurinn þrítugur og bílarnir enn ekki farnir að fljúga eða ganga fyrir rafmagni... vonbrigði. Upside við það að verða þrítugur er að ég er í óviðjafnanlegu formi, helköttaður og tanaður á leið í Galaxy Fitness í vetur... ehhh, kannski þegar ég verð fertugur.

JB

Tveir fyrir einn upp úr glompunni

2010-07-14T16:42:00.003+01:00

Undur og stórmerki áttu sér stað í morgun þegar ég spilaði 18 holur á Hvaleyrarvelli. Nældi í 35 punkta, þokkalega sáttur bara en það dró heldur betur til tíðinda á 17. holu vallarins þegar ég og einn meðspilari minn lentum hlið við hlið ofan í sandglompu!

Mín kúla var fjær holu svo ég átti að slá, dró fram sandjárnið og lét vaða. Í hamaganginum leit ég aðeins upp og pírði augun og viti menn... ég sló báða boltana upp úr glompunni! Nú veit ég ekki hvað reglurnar segja um þetta (sennilega víti á mig eða meðspilaraminn, veit það ekki) en ég stórefa að fremstu kylfingar heims gætu leikið þetta eftir!

JB

Karate-högg á elskuna

2010-07-12T11:11:00.002+01:00

Fjórir laxar lágu í valnum eftir ferðina í Eystri-Rangá í gær. Tvær 9 punda hrygnur og tvær 4ra punda hrygnur. Eintómar skvísur í þessari ferð. Við BB King hófum veiðar á svæði 1, Bátsvaðinu og var undirritaður ekki lengi að setja í þá fyrstu. Löndunin gekk nokkuð brösuglega á þessari 4ra punda hrygnu og þurfti að draga hana yfir talverðar grynningar. Þegar kom að því að veita náðarhöggið hafði mikið gengið á, löndun við nokkuð erfiðar aðstæður, fyrsti lax sumarsins, flugan vel föst í skoltinum og fiskurinn spriklandi fjörugur í höndunum á mér. Þar sem engan hafði ég rotarann var bara eitt til ráða...

Jón Björn Ólafsson reiddi þá fram karate-hönd sína og smellti nettu höggi á milli augnanna á laxinum... samverkamaðurinn Birnir stóð álengdar og fylgdist með. Eftir gott Karate-högg lét Birnir eftirfarandi orð falla:
„Nonni, ég er með rotara!“

Ég leit við spurnaraugum á Birni sem skyndilega skipti litum og sprakk úr hlátri og sagði: „Þú Júdó-choppaðir fiskinn“

Júdó-choppið bar ekki hinn minnsta árangur, ljósin hjá hrygnunni slokknuðu ekki fyrr en Birnir hafði lánað mér rotarann til afnota en Judó-choppið var gott grín allan daginn.

JB

Mynd/Birnir: Svo kom þessi fallega 9 punda hrygna á svæði 9 - black and blue, hvað annað!

Smámunasemin skýtur upp kollinum

2010-07-07T09:57:00.002+01:00

DV hefur sótt í sig veðrið undanfarið enda vill fólk í dag afdráttarlausa umfjöllun í ljósi stöðu vorrar þjóðar. Áðan rakst ég á frétt hjá DV.is sem mér fannst athyglisverð, hún var um nýja borgarstjórann Jón Gnarr. Innihaldið var ekki upp á marga fiska en myndin með fréttinni var athyglisverðari, það fannst smámunasömum Jóni Ólafssyni í það minnsta.

Myndin sem notuð er með fréttinni er skjáskot af Facebook síðu borgarstjórans, dagbók borgarstjóra á fasbókinni. Til þess að geta tekið þessa mynd af fasbókinni verður viðkomandi blaðamaður að hafa ýtt á LIKE hnappinn á dagbók borgarstjórans og er hér jafnvel að koma upp um sig hvað hann kaus í borgarstjórnarkosningunum, klaufalegt.

Við hinn sauðsvarti almúgi treystum því að fjölmiðlar landsins gæti hlutleysis í umfjöllunum sínum en það er fjarri lagi. Mótrök blaðamanns væru sennilega þau að hann þyrfti að hafa ýtt á LIKE hnappinn til að geta fylgst með borgarstjóranum og að sá gjörningur væri engin stuðningsyfirlýsing. Samsæris Jón vill hinsvegar halda því fram að líklegra sé að blaðamaður hafi kosið Besta flokkinn og lái honum það hver sem vill... enda þörfin fyrir breytingar mun nauðsynlegri heldur en nokkurn tíman smámunasemin í einhverjum bloggara.

JB

Það má alltaf finna ljós í myrkrinu

2010-06-30T15:55:00.003+01:00

Í gær fékk ég það vandasama verkefni að greina þremur ungmennum frá því að ekkert yrði úr fyrirhugaðri ferð þeirra til Frakklands næsta laugardag. Fransmenn frestuðu verkefninu fram á næsta ár, tilkynntu mér það svona korter í brottför, smekklegt.

Ungmennin brugðust ágætlega við að ég tel, voru kát yfir því að vera áfram í verkefninu á næsta ári vona ég. Það verður s.s. ekki skrifaður nýr ferðakafli í sögu Jóns Ólafssonar þennan júlímánuðinn.

Það má svo ávallt finna smá ljós í myrkrinu, við frestun Frakklandsferðarinnar kemst ég á meistaramót GVS - golf næstu fjóra daga í röð.

JB

Heimaslóðir Loðvíks og Napoleons handan við hornið

2010-06-29T10:21:00.003+01:00

Á laugardag verður skrifaður nýr kafli í ævisögu Jóns Ólafssonar, Frakkaland skal sótt heim og það í fyrsta sinn á mínum 30 árum hér á móður jörð. Nú verður kannað í þaula hvernig gárungar á borð við Loðvík sextánda og Napoleon höfðu það er þeir riðu um héruð og tíunduðu samlanda sína vinstri hægri.

Lendi í París á laugardag og þaðan er fjögurra tíma lestarferð niður til Bordeaux þar sem við verðum næstu 10 dagana en þetta er verkefni á vegum Íþróttasambands fatlaðra.

Í gær staðfesti wunderground.com svo grun minn - hitinn fer ekki undir 22°C allan tímann sem við verðum úti og albinóinn skelfur! Vörn nr. 30 og ekkert múður, strangur B-vítamín kúr og þá ætti ég að geta snúið vörn í sókn gegn gula bastarðinum og moskítóflugunum.

Svo skilst mér að það sé eitthvað framleitt af rauðvíni þarna á svæðinu... en það má víst ekki í íþróttaferð... tja nema KSÍ láni mér greiðslukortið sitt.

JB
(fékk þessa mynd senda frá skipuleggjendum verkefnisins í Frakklandi)

Morfíslínur Árna á Stöð 2

2010-06-27T00:53:00.002+01:00

DV um stjórnmálaumræðu og orð Árna Páls félagsmálaráðherra á Stöð 2 í kvöld:
http://www.dv.is/frettir/2010/6/26/arni-pall-sjalfstaedisflokkurinn-einangradur-ofga-haegriflokkur/

Þessi frétt sló mig ekkert nema ef vera skyldi fyrir þessa dýru línu sem Árni kastaði fram: ...að flokkurinn óttaðist lýðræðislegan vilja þjóðarinnar í þessu máli."

Þ.e.a.s. að Sjálfstæðisflokkurinn óttaðist lýðræðislegan vilja þjóðarninnar í Evrópusambandsaðildinni... - Ég veit ekki betur en að aðildin hafi verið felld í hverri einustu skoðannakönnun sem framkvæmd hefur verið hérlendis! Annars kemur það mér ekkert á óvart að stjórnmálamaður beiti svona línu fyrir sig enda eru þeir ekki þekkir fyrir að þurfa rökstuðning í sínu máli, þeirra vinna virðist vera ein samfelld Morfískeppni, rökum eða staðreyndum óháð.

ESBaðild er ólýðræðisleg og ekki í anda forvera okkar sem börðust af harðfylgi fyrir því að gera Ísland að sjálfstæðri þjóð... Árna Páli er alveg sama um það - hann vill bara komast á spenann. Það er miklu auðveldara heldur en að glíma við vandann.

JB

Lefty með 9 punda hrygnu

2010-06-24T12:11:00.003+01:00

Fyrstu veiðiferð sumarsins lokið. Ein myndarleg 9 punda hrygna kom á land, þar var á ferðinni Birnir Sær Björnsson með tvíhenduna. Undirritaður kom tómhentur heim... reyndar BB King líka þar sem hrygnunni var gefið líf og eftir á að hyggja voru það stórkostleg mistök. Gaman samt að fylgjast með viðureigninni og sá örvhenti var afar kátur svo vægt sé til orða tekið.

Eystri-Rangá var nokkuð lituð í gær en við sem veiðum svo sjaldan hefðum kastað í hana þrátt fyrir að búið væri að parketleggja ánna!

JB

Smjörvi í matinn

2010-06-21T21:46:00.003+01:00

Yngsti fjölskyldumeðlimurinn, Hólmfríður Eyja, var illa fyrirkölluð eftir langan dag á dagheimilinu þennan daginn. Framan af var hún þó nokkuð spræk en þegar líða tók að kvöldmat seig á ógæfuhliðina. Loks kom maturinn á borðið en gráturinn var hafinn og bleikjan og kartöflurnar fóru niður í ekkasogum.

Þegar sú stutta var langt komin með matinn sinn sá hún okkur móður sína setja smjör á matinn. Drottningin fékk smjörvastykkið í sínar hendur og upp hófst þá einhver furðulegasta athöfn í matarsögu barnsins. Daman tók til hendinni og gúffaði heilu fjöllunum af smjöri í sig... með ekkasogum.

Smjörhnífurinn sjálfur þótti ekki bera nægilegt magn af hnossgætinu svo vinstri hendin var notuð líka til að klóra upp klípurnar og hesthúsa þeim eins og ekkert væri sjálfsagðara.

Héðan í frá á ég svona síður von á því að tefla fram smjörvanum í næstu matmálstímum því í augum Eyju er þetta eitthvert mesta lostæti sem til er ef frá eru taldar súkkulaðikökur.

JB

Narfeyringur: Móðir allra borgara

2010-06-21T01:07:00.000+01:00

Þjóðhátíðardagurinn var haldinn hátíðlegur í Stykkishólmi þetta árið, heimabæ Íslands- og bikarmeistara Snæfells í körfuknattleik. Hólmfríður Eyja Jónsdóttir var síður en svo að hata bæjarstæðið og ekki er laust við að fullorðna fólkið í ferðinni hafi tekið smá ástfóstri við bæinn. Rólegt og friðsælt yfir bænum allan tímann, látlaus 17. júní og þægilega fámennt á ferli.

Vitaskuld var tekin ein ferð á Narfeyrarstofu og undirritaður pantaði einn Narfeyring, þykkur borgari með beikoni, hvítlauk og gráðosti. Móðir allra borgara! Skyldupöntun fyrir þá sem hyggja á ferð í Hólminn.

Á föstudeginum var Golfmót körfuboltamanna, aðeins 31 punktur að þessu sinni en brakandi blíða og albínóinn brann lítið eitt... þrátt fyrir að vera makaður í vörn 30, prufa 50 næst. Skemmtilegur 9 holu völlur í Hólminum og maður hefði nú svo sem getað afgreitt þetta mót betur en segjum að hælsæri hafi verið um að kenna... já, hælsæri, það hljómar vel í þetta skiptið!

JB

Sárt að ESB sé til umræðu

2010-06-16T01:14:00.003+01:00

Þýska þingið setur það skilyrði fyrir aðild Íslands að Evrópusambandinu að Íslendingar hætti hvalveiðum.

Ofangreint er setning úr frétt á MBL.is.
Hvar skal byrja?
-Þýskaland hefur ekki skilning á fiskveiðum og heldur ekki skilning á þeim skaða sem hvalastofninn getur valdið nytjastofninum.
-Aðeins brotabrot af Þýskalandi liggur að sjó.
-Af hverju ekki að veiða hvali? Þeir nálgast nú 100.000 stykki í íslenskri fiskveiðilögsögu og þau dýr sem veidd eru á ári hverju ná ekki þriggja stafa tölu.
-Af hverju ætti ein fremsta fiskveiðiþjóð heims að fella sig undir fiskveiðistefnu Evrópusambandsins þegar sú stefna er aðeins til þess fallin að þurrka upp íslensk fiskimið?
-Svo er ESB brölt ríkisstjórnarinnar til háborinnar skammar. Komi til þjóðaratkvæðagreiðslu um málið verður það kolfellt, örugglega með 70% meirihluta.
-Fjármunum okkar á ekki að verja í að kanna þá möguleika hvort hentugt eða rekstrarlega hagkvæmt sé að láta evrópska-lobbýista stjórna okkur af meginlandinu.

Það er virkilega sárt að sjá að þessi mál skuli vera uppi á borðinu á þessum viðsjáverðu tímum. Réttast væri að taka skref aftur á bak og hætta öllu tali um ESB og aðild að fjötrasambandinu. Á meðan landinu blæðir í ólgusjó og hákarlarnir synda hringi um blóðrákina þá heldur kostnaðarsöm vinna áfram í kringum ESB. Þetta háttarlag yfirvalda og aðgerðaleysi þeirra verður núverandi einstaklingum á þingi til ævarandi skammar.

JB

ps. við erum líka í náðinni hjá Kínverjum og þá getum við veitt eins mikið af hval og við viljum.

Hólmurinn heillar

2010-06-15T12:36:00.003+01:00

Þjóðhátíðardeginum 17. júní verður varið í Stykkishólmi að þessu sinni. Hólmurinn heillar eins og segir í laginu og litla familían verður með góðum vinum í nettu sumarhúsi alla helgina í Stykkishólmi.

Undirritaður fer svo í golfmót körfuboltamanna á föstudeginum þar sem stefnan er vitanlega sett á sigur, hvað annað!

Forvitnilegt verður að sjá hvort runnið sé af Hólmurum eftir fagnaðarlætin síðustu vikur, mér skilst að fólk sé enn hálf „tipsy“ eftir Íslands- og bikarmeistaratitilinn þar á bæ.

JB

Flúðum slagviðrið og sleiktum sólina

2010-06-13T15:57:00.003+01:00

Þá er ferðalagið á enda... mættum í höfuðstað Norðurlands á föstudag og það var barkandi blíða allan tímann. Undirritaður smellti á sig sólarvörn nr. 30 og slapp við allan bruna í þetta skiptið. Það gerði ferðina svo enn ánægjulegri að vita til þess að grenjandi rigning og slagveður var á suð-vesturhorni landsins á meðan við vorum fyrir norðan : )

Litla fjölskyldan tók íbúð á leigu í miðbæ Akureyrar og átti dúndrandi góða helgi. Vorum tíðir gestir í sundlauginni og nærumhverfi hennar enda mikið af leiktækjum og nóg að gera fyrir 19 mánaða grallaraspóa.

Mæli svo sterklega með Indian Curry Hut á Akureyri.

JB

Halló Akureyri

2010-06-11T14:45:00.002+01:00

Höfuðstaður Norðurlands er á málaskránni þessa helgina. Bikarmót Íþróttasambands fatlaðra laugardaginn 12. júní og vafalítið verður hart barist.

Mér finnst ég alltaf vera svolítið HEIMA á Akureyri. Bjó á Ólafsfirði, ættaður úr Svarfaðardal í Dalvíkurbyggð og get enn beitt norðlenskunni fyrir mig til þess að villa á mér upprunaheimildir kalli aðstæður á svoleiðis útúrsnúninga.

Það verður flogið... hefði líkast til aldrei farið þetta akandi enda löngu búinn með minn kvóta í þeim efnum.

JB

Ferðalangurinn

2010-06-09T17:13:00.002+01:00

Í júlíbyrjun held ég til Frakklands og nem þar land í fyrsta sinn. Vinnuferð hjá stráknum sem flýgur út eldsnemma um morguninn og fer svo í fjögurra tíma lestarferð. Jón Motion-Sickness Ólafsson er því afar spenntur fyrir laugardeginum 3. júlí og mun verja restinni af júnímánuði í undirbúning fyrir ferðalagið.

-Tek spinningtíma í gufubaði
-Borða bara hundasúrur
-Sef á steingólfi með pan-pipes tónlist í gangi yfir nóttina

Þetta eru bara nauðsynlegar aðgerðir fyrir mann sem ældi eftir rútuferð frá Ljónagryfjunni og upp í Breiðholt!

JB

(M)amma Rósa 50 ára

2010-06-08T13:16:00.003+01:00

Í dag, 8. júní 2010, er móðir mín 50 ára gömul! Til hamingju með afmælið elsku mamma. Ekki er svo að skilja að móðurhlutverkinu sé lokið, því fer fjarri nú þegar Rósa Ingvarsdóttir er orðin amma eins og sést á meðfylgjandi mynd. Hér eru þær Eyja önnum kafnar við lestur og verða vísast í rjúkandi stuði í afmælisveislunni í dag. Ég hef bara eitt heilræði handa þér mamma mín á þessum merkisdegi þínum:

Við hættum ekki að leika okkur þegar við eldumst, við eldumst þegar við hættum að leika okkur.

Innilega til hamingju með daginn (M)amma Rósa

JBÓ

Endurvekjum Sjómannadaginn um land allt

2010-06-02T10:20:00.003+01:00

Næstkomandi sunnudag þann 6. júní er Sjómannadagurinn. Sú var tíðin að á Sjómannadaginn varð allt vitlaust, fólk gerðist prúðbúið og tók þátt í hátíðarhöldum. Sem barn upplifði maður sína fyrstu Sjómannadaga við Njarðvíkurhöfn og síðar færðist hátíðin yfir í Keflavíkurhöfn og bæjarfélögin héldu sameiginlega upp á daginn. Enn síðar lögðust þessi hátíðarhöld af og hafa enn ekki verið endurvakin undir fánum sameinaðs Sveitarfélags Njarðvíkur, Keflavíkur og Hafna sem í daglegu tali nefnist Reykjanesbær.

Grindvíkingar halda daginn hátíðlegan og nefna Sjómannadaginn sinn fjölskylduhátíðina Sjóarinn Síkáti. Íburðamikil hátíð hjá Grindvíkingum og mikið um að vera í bæjarfélaginu á meðan hátíðinni stendur.

Í dag er Sjómannadagurinn orðinn að fjölskylduhátíð og margir hverjir af þeim sem dagurinn er tileinkaður eru samt á sjó þennan dag sinn. Í mörgum kaupstöðum og öðrum sjávarplássum utan Reykjavíkur hefur sjómannadagurinn orðið mesta hátíð ársins á eftir jólum. Ekki í Reykjanesbæ, eiginlega hvergi nema í Grindavík nú til dags. Önnur sveitarfélög eru með Ljósanótt, Menningarnótt, Færeyska daga, Mærudaga, Humarhátíð, Þjóðhátið, Goslokahátíð, Sandgerðisdaga og þar fram eftir götum. Allt upptalið skipar miklu miklu stærri sess hjá sveitarfélögunum heldur en nokkurn tíman Sjómannadagurinn nema í Grindavík.

Þetta er allt mjög eðilegt í ljósi þróunarinnar, við fórum að líta á sjómennsku sem annars flokks atvinnugrein og í þriðja flokki lenti landvinnslan á aflanum. Allir fóru í skóla og fluttust á mölina (undirritaður er sekur um þá sviksemi). Viðskipti, verkfræði, læknisfræði og lögfræði urðu svarið við flest öllum framtíðardraumum ungmenna og víðsvegar um land lagðist Sjómannadagurinn af með tilstuðlan þeirra menntagæðinga sem ráku viðkomandi sveitar-/bæjarfélög.

Sjálfur kem ég af langri línu sjómanna og reyndi stuttlega fyrir mér á sjó þar sem ég eyddi meiri tíma í að sýna mávunum hvað ég hafði fengið mér í morgunmat en vinna þá vinnu sem lá fyrir hendi.

Ég vona að fleiri fylgi í fótspor Grindvíkinga og geri Sjómannadaginn hátíðlegan í sinni sveit því þrátt fyrir alla okka sviksemi í garð Ægis hafkonungs er það sjávarútvegurinn sem stendur eftir og er enn að skapa tekjur. Þær gætu vissulega verið meiri og dreifðari ef allar diplómurnar og meistaragráðurnar hefðu einhvern tíman farið á sjó í stað þess vega að undirstöðuatvinnugrein þjóðarinnar með því að gefa nokkrum landráðamönnum bróðurpart kvótans en það er efni í aðra grein. Byrjum bara á því að endurvekja Sjómannadaginn um land allt.

JBÓ

Æ - Nei

2010-05-26T14:38:00.004+01:00

Sveitastjórnarkosningarnar 2010 eru handan við hornið og allt útlit er fyrir að Bestiflokkurinn muni komast til valda með Jón Gnarr sem borgarstjóra. Bastían bæjarfógeti mun rísa holdi klæddur í ráðhúsi Reykjavíkur, Jón Gnarr velti því fyrir sér í Kastljósinu hvort borgarstjórastaðan væri ekki svipuð og daglegt amstur hjá Bastían bæjarfógeta. Þetta er svo sem allt gott og blessað og hver veit nema Bestiflokkurinn hafi fólk innan sinna raða sem er „best“ til þess fallið að stýra borginni.

Sem starfsmaður hjá Íþróttasambandi fatlaðra með aðstöðu í Íþróttamiðstöðinni í Laugardal get ég ekki verið annað en áhyggjufullur. Ég fæ ekki betur séð en að í Bestaflokknum séu yfirlýstir anti-sportistar og því miður fæ ég ekki séð hvar íþróttir muni rúmast á stefnuskrá flokksins sem er álíka mikið undur og sólmyrkvi.

Að þessu sögðu á stefnuskrá Bestaflokksins að vera fylgismönnum flokksins nokkur vonbrigði. Nýtt framboð með viðlíka fylgi fyrir kosningar sem heldur spilunum svo þétt að sér að maur í fórsturstellingu kæmist ekki þar á milli hlýtur að vera vonbrigði. Það fær enginn í raun að vita hvað flokkurinn hyggst gera og eftir ítarlega leit á síðu flokksins fæ ég ekki séð að orðið íþróttir komi fyrir einu sinni.

Flokkur með þjóðþekkta listamenn innan sinna vébanda er ekki til þess fallinn að þjóna hagsmunum íþróttahreyfingarninnar og því hef ég gert upp hug minn, ég ætla EKKI að kjósa besta flokkinn.

JBÓ

75

2010-05-19T12:01:00.002+01:00

Aðeins 75 dagar þangað til flatmögun á Spánarströnd verður að raunveruleika... að því gefnu að E-15 haldi sig á mottunni þann 2. ágúst næstkomandi. Langþráð sumarfrí í góðra vina hópi og golfsettin verða með í för.

Ég var að koma heim frá Svíþjóð á þriðjudagsmorgun eftir allnokkra bið á flugvellinum ytra og þar var maður svo sem ekkert að flagga íslenska passanum í óspurðum fréttum. Gosið ekki alveg að gera sig í PR-málum fyrir okkur Íslendinga.

JBÓ

Vorverkin

2010-05-09T16:21:00.002+01:00

Vorhreingerningunni á svölunum í Skipholti 51 er nú lokið! Guði sé lof. Nú má sumarið hrynja inn í öllu sínu veldi enda vorverkin afar hvimleið í þessu umferðarþunga umhverfi. Í bak og fyrir er þung umferð við blokkina okkar og umferðarúrgangurinn smýgur inn um öll göt og í allar rifur. Við hjónin vorum góða tvo tíma að þrífa svalirnar.

Þetta væri 15 mínútna verk ef rafmagnsbílarnir væru komnir í umferð!

Ætti maður að þora í Gnarr?

2010-05-05T15:45:00.005+01:00

Er það ráðlegt að gefa Bestaflokknum atkvæði sitt í komandi borgarstjórnarkosningum? Hér eru dæmi um stefnumál flokksins:

Hlusta meira á konur og gamalt fólk
Ókeypis tannlæknaþjónusta fyrir börn og aumingja
Ókeypis í strætó fyrir námsmenn og aumingja

Jón Gnarr er búinn að koma borginni í klípu, fólk veit ekki hvort taka skuli framboðið alvarlega eða á gamansömum nótum. Ég hef hef ekki enn gert upp hug minn en nafni Gnarr kemur sterklega til greina hjá mér.

JBÓ

Frændaskaup

2009-06-15T12:10:00.002+01:00

Sem ungur drengur á Ólafsfirði sat ég inni á hársnyrtistofu og var að láta klippa mig því framundan væri sko stuð. Ættarmót var á næstu grösum og ég skyldi sko vera flottur á því þegar ég hitti allt frændfólkið mitt. Nú! Verandi á Ólafsfirði þá þekkti ég alla inni á hársnyrtistofunni og allir þekktu mig. Það var því spjallað um daginn og veginn og það barst í tal að ég væri á leið suður með sjó. Vitaskuld vildu allir fá að vita hvert erindið væri því það þekkist víst ekki hjá Norðlendingum að fara erindisleysu á mölina.

Eitthvað var spurningin um erindið sjálft að flækjast fyrir mér og eftir nokkrar vangaveltur sagði ég að ég væri að fara suður á frændaskaup. Ég man ekki fyrir mitt litla líf hver viðbrögðin voru inni á stofunni en móðir mín ástkær hefur í seinni tíð sagt mér að það sé enn verið að hlægja að þessu orðskrípi mínu á Ólafsfirði. Nú er svo í pottinn búið hjá ætt föður míns að það er ekki til neitt sem heitir ættarmót. Orðið frændaskaup hefur haft betur allar götur síðan árið 1986 þegar það fyrst leit dagsins ljós.

Hvað eflingu og upphefði íslenskrar tungu finnst mér ég hafa staðið vaktina og hef staðið hana allar götur síðan þennan örlagaríka dag á hársnyrtistofunni á Ólafsfirði. Þess má svo geta að ég er akkúrat á leiðinni á frændaskaup um helgina.

JB

Þú verður ekki fallegur með frægðinni!

2009-05-19T17:08:00.001+01:00

Góð og gild ástæða er fyrir handbremsum í öllum sjálfrennireiðum og nú er mál að rífa í handbremsuna á því máli sem í daglegu tali nefnist Alexander Rybak. Kappinn varð um helgina heimsfrægur fyrir að vinna Júróvisjónkeppnina fyrir hönd Norðmanna en það sem hefur verið í mestu hámæli í tengslum við sigur hans er hve fallegur, myndarlegur eða gerðarlegur hann sé. Hingað og ekki lengra!

Nú bara hættir þessi fásinna og það strax í gær. Alexander Rybak er ekki fallegur eins og meðfylgjandi mynd gefur sterklega til kynna. Ég þekki a.m.k. 17 karlmenn á Íslandi sem svipar til Alexanders og allir eiga þeir það sammerkt að vera ekki fallegir. Þeir kunna ekki á fiðlu og hafa ekki nýlega farið með Gillet Mach 3 rakvélina á milli augabrúna sinna en ef svo væri myndu þeir samt ekki teljast fallegir. Að horfast í augu við staðreyndir og viðurkenna að maður hafi látið gabba sig inn í stjörnufansið er eitt en annað og verra er að segja að ómyndarlegur karlmaður sé fallegur. Lagið hans Alexanders vann verðskuldaðan sigur í Júróvisjón en það er í besta falli fáránlegt að segja flytjandann eitthvert sjarmatröll.

Á venjulegri djammhelgi fyrir Júróvisijón hefði Rybak aldrei náð sér í geddu fyrir kl. 05 að morgni. Hinsvegar verður svona afturkreistingur allt í einu kyntákn eftir 3 mínútur á sviði í Rússlandi. Meira að segja Páll Óskar dósent í Júróvisjónfræðum sagði að Rybak væri hönk og kyntröll og allt í þessum dúr. Í fyrsta skiptið í langan tíma fannst mér Páll Óskar stíga feilspor!

Ef Rybak er þetta kyntákn getum við þá ekki sagt slíkt hið sama um bara allt frægt fólk?Woody Allen, Seal, Sigurjón Kjartansson, Björk, Krummi Bóson og margir fleiri eru til kallaðir og allt vafalítið yndislegar sálir en seint verða þau efniviður í fegurðarsamkeppnir... og að því sögðu mætti líka alveg leggja þær niður.

Við skulum bara aðeins ,,hand“bremsa okkur af í þessum fagurgala til handa frægum greppitrýnum og muna að þau eru fræg en það gerir þau ekki endilega falleg.

JB

Alger vitleysa

2009-05-04T17:24:00.002+01:00

Gömul hjátrú segir það vita á gott sumar ef vetur og sumar frjósa saman en það gerðist einmitt hér í Reykjavíkinni að morgni sumardagsins fyrsta, fönn á jörðu í dagrenningu. Sem ég sit hér við þetta pár hugsa ég að ekki væri vitlaust að splæsa í eina örk eins og Nói og hreinlega sigla heim. Hellidemba og hvassviðri hafa verið allsráðandi síðan þessi fyrsti sumardagur rann upp.

Sumarið í fyrra var snilld, ég man að á heitasta degi sumarsins fór ég í golf í Mosfellsbæ og þá var 30 stiga hiti. Ég hóf leik með þremur gamalmennum og eftir aðeins fjórar holur, og verandi á golfbíl, voru þessir öldungar gersamlega sprungnir á limminu. Héldu rakleiðis upp í skála að fá sér bjór. Viðlíka veðurblíða og þá er eitthvað svo fjarstæðukennd hérna í slagviðrinu og maður getur ekki annað en hlegið að því að vera svo heimskur að hafa yfir höfuð hlustað á þessar kreddur; ,,það veit á gott sumar ef vetur og sumar frjósa saman!" Þvílík vitleysa.

Verandi ung og efnileg kynslóð sem brátt tekur við þjóðarskútunni getum við farið að búa til okkar eigin bull. Hér koma nokkrar tillögur:

,,Þú skalt hella niður salti ef bröndóttur köttur er í fréttatíma RÚV á páskadag."
,,Ef örvhentur maður berar sig í sumarsólstöðum er vissara að nota fósturstellinguna."
,,Maður með óeðlilega lítið höfuð getur á hlaupaári sótt um miskabætur í sínu stéttarfélagi ef hann telur að þessi aukadagur í febrúar valdi honum höfuðverk."

Ekki svo slæmt...

JB

Elmar á Alþingi!

2009-04-22T21:44:00.002+01:00

Menn beita misjöfnum brögðum í kosningabaráttunni og nú er svo búið að mágur minn Elmar Sigurðsson er kominn í framboð! Kappinn er í 8. sæti í Suðurkjördæmi hjá P-lista Lýðræðishreyfingarinnar, ja hérna hér! Friður 2000 betur þekktur sem Ástþór Magnússon fer þar fremstur í flokki en útsendari á hans vegum fékk Elmar til þess að styðja flokkinn í söfnun sinni á nöfnum til þess að mega bjóða fram til alþingiskosninga.

Stuðningsyfirlýsingin var væntanlega ekki bindandi en svo kemur það bara í blöðunum að Elmar Sigurðsson bílstjóri að Hvassaleiti 155 í Reykjavík sé í 8. sæti í framboði Lýðræðishreyfingarinnar í Suðurkjördæmi. Þennan gjörning hefði mágur minn örugglega aldrei samþykkt en í framboði er hann engu að síður. Þá er bara að vona að Lýðræðishreyfingin verði aðeins lýðræðislegri ef þeir koma manni á þing, tala nú ekki um ef þeir næla sér í einhvern meirihluta. Ég býst samt við því að kölski komi skríðandi úr víti með frostbit áður en það verður!

Íþróttasögur og... kvæði!

2009-04-08T12:55:00.001+01:00

Flestir ef ekki allir kunna vel að meta góðar sögur úr heimi íþróttanna. Þá yfirleitt þær sem ekki tengjast leik eða annarri keppni heldur þeim sögum sem fara af liðunum eða eintaklingunum. Sjálfur kann ég nokkrar og upplifði af mikilli kátínu þegar Jón Guðbrandsson fyrrum þjálfari minn söng okkur í körfuboltaliðinu í svefn á Akranesi: ,,White boy, white boy, what you gonna do, what you gonna do when the lights go down?“ Menn hlógu heil óksöp af þessari söngframmistöðu en þegar rýnt var í textann þorði enginn í háttinn!

Jens Arnar tæklaði stelpu, Steinn Jóhannsson varð frægur markvörður þó hann sé ekki til í Þjóðskrá, Grelli Hemm með handklæðið um hálsinn tilbúinn í handalögmál í Sláturhúsinu og svona mætti lengi telja en hér um daginn fékk ég kvæði upp í hendurnar. Þetta kvæði er víst runnið undan rifjum Samúels Arnar Erlingssonar fyrrverandi íþróttafréttamanns hjá RÚV og er það bara nokkuð vel úr garði gert:

ÉG ER MESTUR
ÉG ER BESTUR
ÉG GET ÉTIÐ EINS OG HESTUR
ÉG ER ÍSLANDS EINA VON

ÉG ER SAMÚEL ÖRN ERLINGSSON

Minning um aprílgabb

2009-04-01T15:31:00.002+01:00

Ætli árið hafi ekki verið svona 2003 eða 2004. Að kvöldi 31. mars lagði ég inn skilaboð til nokkurra vina minna um að sækja mig daginn eftir til að komast út í bæ og ná í minn eigin bíl í viðgerð. Kapparnir áttu að mæta kl. 7.30 að morgni 1. apríl niður á Skólavörðustíg þar sem ég bjó.

Nú, þegar 1. apríl rann upp og klukkan sló 7.30 voru komnir fjórir bílar fyrir utan húsið mitt. Þessir fjórir vinir mínir sem ég boðaði alla á fölskum forsendum til að sækja mig voru forstöðumaður virtrar bílaleigu, bankastarfsmaður, lögfræðinemi og starfsmaður í herrafataverslun. Eins og gefur að skilja var ég bara íslenskunemi við Háskóla Íslands en tókst samt að fá þessa fjóra forkólfa til þess að hlaupa (keyra) aprílgabb. Fyrir lítilmagnann var þetta stór sigur og honum fagnað með stríðsdansi á gangstéttinni framan við bílana fjóra þar sem nývaknaðir kapparnir biðu eftir mér, hver í sínum bíl.

Þrír þeirra tóku aprílgabbinu mjög vel og einn meira að segja skutlaði mér í skólann, Peugottinn 205 Forever Sport fékk því frí þennan daginn enda alveg búinn á því að bera þessa heimsins stærstu topplúgu á sér öllum stundum. Einn kappinn hinsvegar var ekki alveg jafn sáttur við þetta aprílgabb og spólaði í burtu af þvílíku afli að helluleggja þurfti Skólavörðustíg strax næsta sumar.

Mér er minnisstæður svipurinn á þeim sem spólaði í burtu, brjálaður (hann var s.s. starfsmaður herrafataverslunarinnar). Hann sendi mér löngutöngu sem jafnan þýðir að maður eigi að fara í rass og rófu en langatöngin nötraði svo ég tók þetta sem skilaboð um eitthvað miklu verra en rass og rófu. Svipurinn á mínum manni kl. 7.30 að morgni til, vitandi það að hann hefði hlaupið aprílgabb og átti ekki að mæta í vinnuna fyrir kl. 11:00. Þetta var yndisfögur sjón, litla andlitið hans var blóðhlaupið af reiði og hann spólaði svo hratt í burtu að háu kollvikin virtust vera eins og sportrendur á hausnum á honum um leið og hann brunaði hjá.

Enn þann dag í dag hefur hann ekki fyrirgefið mér. Til hamingju með daginn elsku ..... minn.

JB

Rottan

2009-03-27T15:38:00.001+01:00

Svakaleg gósentíð er í kannabisáhlaupi lögreglunnar um þessar mundir. Fyrir skemmstu fóru að berast fregnir af því að lögreglan væri að gera upptækar kannabisverksmiðjur og nú hefur hún gert upptækar um 6000 kannabisplöntur. Þeir svörtu og hvítu hafa einhvers staðar dottið í lukkupottinn. Þeir hafa handtekið einhverja auma sál sem var að rækta 2-3 plöntur heima hjá sér og nú lekur þessi aðili öllu í lögguna sem á mettíma hefur eyðilagt helstu útflutningsvon Íslands í efnahagsmyrkrinu.

Ég sé rottuna alveg fyrir mér biðja um camel filterslausan í yfirheyrslum og þegar Geirjón sjónvarpslögga neitar rottunni um camelinn af trúarlegum ástæðum þá brotnar rottan saman og byrjar að þylja upp heimilisföng. Í forvitni sinni rambar lögreglan á staðina sem rottan missti út úr sér í örvinlan og viti menn, fullt hús af ganja!

Ég veit um nokkra sem myndu ekki þola yfirheyrslu mikið lengur hálfa mínútu. Þið vitið hver þið eruð... já, rotturnar ykkar : )

Gluggaveður

2009-03-26T16:11:00.002+01:00

Síðustu daga hefur verið hreint stórbrotið að stara út um gluggan. Heiðblár himinn og golffiðringurinn gerir vart við sig. Undirritaður gerir á þessum tíma ávallt sömu mistök!

Hugurinn reikar inn í sumarið og klæðaburðurinn eftir því léttur. Þegar út er komið blasir við allt annar raunveruleiki. Upplitsdjarfur maðurinn brýtur næstum því í sér tennurnar er þær skella saman út af nístingskulda og eftir nokkra svona daga í röð stendur maður uppi með flösu, tóma rakakremstúpu og helaumar geirvörtur því þær reyna næstum því að flýja inn í brjóstkassann á manni þegar út er komið.

Gluggaveður...einhver mesta ógn heilsunnar. Eins og sjá má á meðfylgjandi mynd er góðvinur minn Birnir Sær Björnsson líka að drepast í geirvörtunum en það er af því að hann rennir sér alltaf á maganum í rennibrautinni í Laugardal!

JB

Vefsíða dagsins

2009-03-25T11:24:00.000+01:00

Nýverið fékk ég himnasendingu http://www.atdhe.net/

Þessi vefsíða býður upp á beinar útsendingar frá íþróttaviðburðum sem og nýjustu þættina í sjónvarpinu. Gæðin eru ekkert til að hrópa húrra fyrir á tímum flatskjáa og margmilljónkróna heimabíókerfa en þetta er töluvert ódýrara en áskriftarsjónvarp eða gervihnattadiskur.

Fyrir þá sem hafa t.d. gaman af Heroes (eins og ég) þá er 20. þáttur í þriðju seríu kominn í loftið á þessari ágætu síðu. Þar er allt að verða vitlaust!

60 metrar á 8,90 sek

2009-03-20T14:45:00.003+01:00

Heimsmetið hjá Jamaíkumanninum Usain Bolt í 100m. hlaupi er 9,72 sek! Ég ákvað að taka símann með mér í ræktina áðan og taka tímann á mér í 60m. hlaupi. Niðurstaðan var 8,90 sek. Þarna hafði ég minna en eina sekúndu til að hlaupa 40 metra til þess að slá heimsmetið.

Þetta var tilraun dagsins og vel til þess fallin til að átta sig á því hversu ruuusalegur hlaupari Usain Bolt er í raun og veru. Ég ætla að mæla tímann minn í 60m. hlaupi aftur í næstu viku og þá er markmiðið 8,50 sek.

Ljós punktur á dapurri niðurstöðu

2009-03-18T21:49:00.003+01:00

Njarðvíkingar, mínir menn í körfuboltanum, eru komnir í sumarfrí þetta árið, því miður. Það sem verra er, Keflvíkingar sendu okkur í sumarfrí. Það er ekkert jafn fúlt og að liggja fyrir Keflavík enda slagsmál þessara liða í gegnum tíðina sætasta konfektið í körfuboltakonfektkassanum. Þó verð ég að viðurkenna að snillingur í appelsínugulum spandexgalla bjargaði tímabilinu, ef svo má að orði komast.

Kappinn mætti á leik nr. 2 hjá Njarðvík og Keflavík í úrslitakeppninni íklæddur þessum forláta galla og viti menn... snillingurinn var fenginn til þess að taka borgarskot Iceland Express og hann hitti... ja hérna.

Þetta var vissulega ljós punktur á dapurri niðurstöðu fyrir Njarðvíkinga en samt var þetta eitthvað svo súrsætt því þessi appelsínuguli snillingur er... úff... Keflvíkingur!

Jæja, sjáið bara nánar um málið hér:
http://www.karfan.is/index.php?option=com_content&task=view&id=8767&Itemid=1

Greyið hann Sigurður

2009-03-17T14:25:00.002+01:00

Sigurður greyið er kominn aftur inn í Idol Stjörnuleitina! Fyrir þá sem sáu þennan atburð á Stöð 2 síðasta föstudag var þetta nokkuð hjákátleg uppákoma. Simmi og Jói ásamt dómurunum í keppninni urðu í þrígang að hafna Sigurði og var kappinn orðinn nokkuð ringlaður í lok þáttar.

Nú er Sigurður kominn inn í keppnina því æðstu máttarvöld Idolsins hafa miskunnað sig yfir hann. Ef ég hefði verið Siggi greyið þá hefði ég hafnað þessu boði, stofnað band sem heitir Death to Idol og byrjað ekki seinna en í gær að túra og láta öllum illum látum. Það hefði selt mun betur heldur en að halda áfram í Idolinu og detta út í næstu umferðum... en greyið Siggi býður þjóðinni upp á að hafna sér enn eina ferðina. Ég hefði keypt disk með Death to Idol!

Já, greyið Siggi að grípa ekki gæsina.

Fésbók

2009-03-13T00:20:00.003+01:00

Fésbók!

Tímaþjófur eða bylting í samskiptatækni?
Í mínu tilfelli = tímaþjófur.

Ég get ekki sagt að samskiptin sem ég stend í á Fésbók séu af eftirsóknarverðum meiði. Síður en svo. Á Fésbók er maður jafnan að bauna einhverju á félaga sína, svarandi könnunum og skoðandi myndir af fólki sem maður hittir kannski 2-3 sinnum á ári. Þarna hef ég átt hrókasamræður við fólk sem ég hef ekki einu sinni hitt á árinu 2009. Þegar svo áðurnefndum samskiptum lýkur hvað stendur þá eftir? Jú, sú staðreynd að maður er enn ekki búinn að hitta viðkomandi og hefur eflaust mun fleira við hann að segja en maður nennir að koma að á lyklaborði Fésbókar.

Ég er háður Fésbók. Mér líkar það illa en á Fésbók getur maður fylgst vel með öllu, þ.e. öllu því sem er framundan. Fólk auglýsir viðburði, hluti til sölu, stuðningi sínum við hina og þessa og mótmælir því sem miður er og allt þar fram eftir götum. Á Fésbók eru sumir að kveikja ástarblossa og er það vel en svo koma snillingarnir eins og Breti einn sem missti vinnu sína um daginn. Hringdi sig inn veikann en statusinn hans á Fésbók sagði að kappinn hefði verið á djamminu, snillingur. Sumum er ekki treystandi fyrir tækninni en á meðan þú lesandi góður varst að lesa þennan miður góða pistil minn þá hefðir þú getað skoðað fjölda mynda, sent fjölda skilaboða og gert allt milli himins og jarðar á Fésbók, af hverju ert þú ekki þar núna?

Góðar stundir

She´s back!

2009-03-11T15:36:00.004+01:00

Britney Spears svíkur engan. Í endurkomu sinni í Louisiana bauð hún upp á þessa mögnuðu glennu og viti menn... fréttin er ein sú mest lesna á Vísir.is í dag. Skyldi nokkurn undra? Leðurpjatlan sem hylur leyndardóminn er þó helst til of strekkt... en hey, hver er að spá í því, þetta er Britney!

Nú þegar heimurinn rambar á barmi gjaldþrots hefur þessi snúlla selt 1,3 milljónir eintaka af nýjustu plötunni sinni... það sýnir kannski best að þótt kreppan éti marga út á gaddinn þá er það Britney sem á hug og hjörtu heimsins. Fjölbreytni er krafa sem fjölmiðlar vinna undir og Britneyfréttir lesast vel en að tónlistin hennar skuli seljast vel segir manni aðeins eitt. ÞAÐ ER ENGIN LEIÐ ÚT ÚR KREPPUNNI! Ef fólk er að eyða peningunum sínum í þessa froðu þá eigum við bara skilið að vera í kreppu til eilífðarnóns.

Góðar stundir

Að verða 5 mánaða gömul

2009-03-10T00:28:00.003+01:00

Að eiga næstum því 5 mánaða gamla dóttur er góð skemmtun! Hólmfríður Eyja er farin að snúa sér yfir á magann og þegar þangað er komið kárnar gamanið því henni finnst fátt jafn erfitt og leiðinlegt að liggja á maganum. Stundum líður mér þannig! Stundum líður mér eins og ég liggji á maganum og geti mig hvergi hrært þegar litla daman lítur á mig með stóru bláu augun sín og heimtar að fá mjólk. Ég viðurkenni að ég er ekki í mínu besta líkamlega atgervi en seint færi ég að láta hana á karlabrjóstin mín svo enn um sinn er Hilma einvaldur á heimilinu en það breytist þegar ég fæ að stappa gulrætur og annað lostæti ofan í Eyju. Þangað til pækla ég bara mínar tunnur, á maganum, og læt mér það vel líka enda vart annað hægt þegar sú stutta sprettur fram með jafn miklum tilþrifum.

Annars er heljarinnar helgi framundan, 15 ára fermingarafmæli þar sem dagurinn verður tekinn snemma í grannaglímu við Keflvíkingana í 1980 árganginum. Körfubolti í Yankee-Stadium kl. 11:00 á laugardagsmorgun. Frítt inn en áhorfendur verða rukkaðir um 50 kr. fyrir hverja troðslu sem þeir sjá : )

JB
(Mynd: Litla daman er líka komin með lúkkið á hreint! Hvern fjandann ertu að mynda mig í sturtu þarna kall)

Fangelsið Nóatún

2008-12-16T12:11:00.004+01:00

Við yfirvofandi lokun á nýja fangelsinu á Akureyri hefur Nóatún tekið að sér að skammtímavista búðarþjófa og af því tilefni fór fréttamaður síðunnar á stúfana. Hér sést hópur misyndismanna bíða lausnar í Nóatúni og margir hverjir þeirra voru orðnir ansi æstir!

Myndataka:
Steven Spielberg

Hljóð:
THX

Aðalleikur:
Angelina Jolie

Áhættuatriði
Leikhópur ríkisstjórnarinnar

Sérstakar þakkir við framleiðslu á þessu innslagi fær Bónus.

Framleiðum rafmagnsbíla!

2008-11-11T00:37:00.003+01:00

Ég var rétt í þessu að ljúka við að horfa á með öðru auganu myndina hans Al Gore. An Inconvenient Truth. Hnattræn hlýnun er þar þungamiðjan í myndinni og var myndin einn stór fyrirlestur einhverstaðar í Bandaríkjunum. Vissulega fékk þessi ræma mann til þess að hugsa en það var ekki fyrr en kreditlistinn kom í enda myndar að maður fékk smá upplýsingar um hvað maður gæti gert til að leggja sín lóð á vogarskálarnar.

Hið furðulega er að þessi mynd og endi hennar fékk mig umsvifalaust til þess að hugsa um ástandið hér á Íslandi og hvað við gætum gert. Við framleiðum fátt annað en fisk sem telst okkur til verulegra tekna því nú hefur það sýnt sig þegar bankarnir eru hættir að styðja íþróttaliðin og gefa kirkjum orgel að þeir voru ekkert annað en barn sem kemst í deigið þegar mamman er að baka, óhjákvæmilegur magaverkur fylgdi í kjölfarið. Pabbi (yfirvöld) ráku svo náðarhöggið með því að loka eldhúsinu!

Í umræðunni síðustu daga hefur þeirri spurningu verið varpað fram um hvað Íslendingar gætu gert í þessu ástandi og að nú væri tækifæri í kreppunni að hlúa vel að sprotafyrirtækjum og hér er ein hugmynd í þann pott sem tengist myndinni hans Gore. Það sló mig að í lok myndar eru áhorfendur hvattir til að kaupa ,,tvinn bíla" sem ganga á rafmagni og bensíni eða bensíni og vetni eða hvernig nú sem þeir virka. Eina alvöru lausnin í þessu máli er framleiðsla á rafmagnsbílum.

Við Íslendingar höfum barið okkur á brjósti og hömpum mannauðnum í hvívetna, hér heima sem og utan landsteinanna. Hvar er þessi mannauður nú? Er ekki tímabært að allir heilarnir setjist nú niður og skapi vöru í höndum okkar sem heimsbyggðin öll gæti notið góðs af? Rafmagnsbílarnir eru klárlega svarið!

Hversu flókið getur það verið að smíða einn rafmagnsbíl? Var ekki einn snjall kauði að hanna kafbát sem mælir hrognamagn í fiskum eða eitthvað þvíumlíkt? Væri ekki betra að taka þessa vísindakeppni upp í HÍ og hætta að láta ósofna verkfræðinema keppast við að koma banana í gegnum pústurör með títiprjóna og sláttuvélamótor að vopni? Er kröftum okkar ekki betur varið í að skapa vöru sem selst vel og er svo sannarlega náttúruvæn? Auðvitað er svarið já en bölsýnismenn segja að tími rafmagnsbíla sé liðinn því olíufyrirtækin hafi séð til þess að þeir kæumst ekki á markað!

Ísland á ekki olíu og þau réttindi sem gætu hugsanlega í framtíðinni veitt okkur aðgang að olíu eru sjálf um sig fallin í skuldafeni örfárra manna og vankunnáttu okkar sem þjóðar við að bora eftir olíu og fullvinna hana fyrir heimsmarkað.

Við þekkjum rafmagn og jarðhita, hvernig væri að nýta þá þekkingu og búa til milljónir rafmangsbíla? Einhver framleiðir plast hér á Íslandi og við gætum örugglega framleitt gúmmí, yfirvöld myndu bara standa straum af þeim efniskostnaði frá öðrum löndum sem fellur til við gerð rafmangsbíla á meðan heilarnir sætu yfir frumgerðinni af bílnum.

Þetta er kjörið tækifæri fyrir okkur sem þjóð til þess að rétta við þjóðarskútuna og ég sem kann vart að setja inn vírusvörn í tölvuna mína tel að þetta sé afar einfalt.

JBÓ

Skotta kraftmikil á sængurkvennadeildinni : )

2008-10-28T01:23:00.002+01:00

Kom í heiminn á kvennafrídaginn

2008-10-26T00:05:00.004+01:00

Jæja, þá er hún komin í heiminn hún Skotta Jónsdóttir eins og við köllum þessa elsku. Skotta kom í heiminn þann 24. október kl. 19:05 á sjálfan Kvennafrídaginn. Ekki amalegt það. Hún rétt skreið yfir 14 merkur og var 53 sm. löng. Vitaskuld erum við bara í sjöunda himni með þetta allt saman og þegar þetta er ritað er pabbinn meir heima, einn í kotinu, þar sem mæðgurnar eru á sængurkvennadeildinni. Þær drottningar eru væntanlegar heim í byrjun næstu viku og þá verður sko kátt í höllinni.

Kveðja,

Jón Björn, Hilma og Skotta : )

Ólympíumótið hafið

2008-09-07T05:12:00.003+01:00

Opnunarhátíð Ólympíumóts fatlaðra í Peking var sko ekkert slor! Gæsahúðin lét heldur ekki á sér standa þegar maður labbaði út á leikvanginn með íslenska hópnum og tæplega 100.000 manns tóku manni fagnandi. Nú höfum við verið hér í Peking í tæpa viku og keppnin sjálf er brostin á eftir mikinn undirbúning og glæsilega opnunarhátíð.

Ólympíuþorpið sjálft er veglegt í alla staði og hvergi skortir okkur nokkurn skapaðan hlut. Þó finnur maður að það er kominn smá spenningur í hópinn fyrir því að komast niður í bæ og gera kostakaup. Verðlagið er líka nokkuð frábrugðið því sem við eigum að venjast heima og hefur maður heyrt heilu golfsettin fara á tæpar 30.000 kr en í mörgum tilfellum er það verðið á einni golfkylfu heima.

Þetta er búið að vera magnaður viðburður hingað til og einvörðungu meira sem á eftir að koma og mun ég smella inn hér fleiri myndum og frásögnum síðar meir.

Kveðja frá Kína,

JBÓ

Óheppileg tímasetning!

2008-08-26T23:13:00.003+01:00

Íslenska kvennalandsliðið í körfuknattleik á við ramman reip að draga annað kvöld þegar það mætir svissneska landsliðinu í Evrópukeppni B-deildar. Leikurinn hefst kl. 19:15 en um svipað leyti hafa Hr. Ólafur Ragnar Grímsson forseti íslenska lýðveldisins og Frú Þorgerður Katrín Gunnardóttir mennta- og íþróttamálaráðherra boðað til þjóðhátíðar. Tilefnið er engum dulið en fögnuður í formi mótttöku á silfurhetjum þjóðarinnar frá Ólympíuleikunum hefst kl. 18:00 að Hlemmi.

Kvennalandsliðinu í körfuknattleiks veItir svo sannarlega ekki af stuðningi sem flestra en að mér læðist sá grunur að margir þeir sem ætluðu sér á leikinn fari frekar niður í bæ að fagna silfurhetjunum og er það bara vel. Ekki á hverjum degi sem við vinnum silfur í handbolta á Ólympíuleikum. Það er bara vonandi stelpnanna vegna að hátíðarhöldin standi ekki yfir mikið lengur en klukkustund og svo geta allir haldið landsliðsgleðinni áfram með því að mæta á Ásvelli í Hafnarfirði og styðja stelpurnar til sigurs : )

Býst þó við því að þetta taki aðeins meira en klukkutíma að fagna handboltahetjunum. Vonandi verðum við ekki heimsmeistarar í kvennakanttspyrnu þegar næsti landsleikur kvennakörfuboltaliðsins fer fram hér á landi!

JBÓ

Allur vindur úr manni

2008-08-24T19:59:00.003+01:00

Það er ekki laust við að maður sé eftir sig nú þegar silfurverðlaun íslenska handboltaliðsins eru í höfn. Við Hilma fórum í brúðkaup á laugardagskvöldið og svo vakin snemma til að fara í handboltapartý hjá Stínu tengdó. Strákarnir okkar áttu aldrei séns í Frakkana en þetta var engu að síður magnað hjá þeim. Þá verður virkilega gaman að fylgjast með því þegar liðið kemur heim og sjá hvernig mótttökur þeir munu fá.

Eftir leik var allur vindur úr manni og maður er búinn að vera vakandi sofandi í allan dag. Óvenjulegt að vakna svona snemma á sunnudegi en mér segir svo hugur að þegar litli erfinginn kemur í heiminn þá verður örugglega einhver breyting á klukkunni hjá manni : )

Spenntur fyrir hjólastólaruðningi

2008-08-14T16:56:00.003+01:00

Þá er þetta allt farið að opnast fyrir manni. Íslendingar segja nú margir sögur sínar frá Peking þeir sem keppa þar eða fjalla um Ólympíuleikana og ferð okkar hjá Íþróttasambandi fatlaðra tekur stöðugt á sig nýja mynd. Við leggjum af stað 1. september og opnunarhátíð Ólympíumótsins fer fram þann 6. september næstkomandi.

Margir ruglast oft á þessum orðum, Ólympíuleikar og Ólympíumót. Það er heiðursmannasamkomulag millum þessara fylkinga að einvörðungu Ólympíuleikarnir beri sitt nafn og því fékk íþróttakeppni fatlaðra nafnið Ólympíumót. Í þriðja stað kemur Special Olympics sem er Ólympíumót þroskaheftra. Alls ekki svo flókið fyrir þjálfað auga starfsmann íþróttahreyfingar fatlaðra en fyrir hinn venjulega leikmann gæti þetta reynst þrautinni þyngra að muna. Eins er Íþróttasamband fatlaðra jafnan kallað Íþróttafélaga fatlaðra en það er aðeins til eitt Íþróttafélag fatlaðra og það er félagslið, þetta er sambærilegt og að ruglast á KR og KSÍ í fótboltanum.

Eitt sem hefur fangað athygli mína undanfarið er hjólastólaruðningur og verður keppt í þeirri grein á Ólympíumóti fatlaðra. Þar er engin miskunn eins og sést á þessu myndbandi:

http://www.youtube.com/watch?v=eKlmviAqMOc&feature=related

JBÓ

Styttist í Peking

2008-08-04T16:01:00.003+01:00

Ja hérna, nú styttist óðfluga í Ólympíumót fatlaðra sem hefst nánast strax að Ólympíuleikunum loknum í Peking. Ólympíumótið fer fram dagana 6.-17. september næstkomandi og verður á sama stað og Ólympíuleikarnir. Þar verð ég með í för hjá Íþróttasambandi fatlaðra og ekki laust við að maður sé orðinn nokkuð spenntur!

Ég fer út 1. september og kem aftur heim 18. september svo þetta er ferðalag í stærri kantinum. Mín bíða líka nokkrar vel valdar sprautur hér á spítala einum áður en ég get farið út. Þetta eiga að vera allskonar lyf og lyfleisur við hvaða pest sem kann að finnast í Kína. Mér finnst þessi mengunarmál þó vera stærsta pestin þarna úti, það sést vart á milli bygginga þarna í borginni en Kínverjarnir lofa bót og betrun.

Þessi mynd er af aðalleikvanginum á Ólympíuhátíðinni í ár og heitir hann Birdsnest. Enda keimlíkt fuglshreiðri. Þeir í Kína hafa ekki verið auðveldir í öllum þessum skráningarmálum og hverjum keppanda, þjálfara eða umsjónarmanni fylgja þvílíkar skriffinnskur að annað eins hefur vart sést. Kínverjarnir hafa þó verið duglegir að hafa þetta rafrænt svo eitthvað eru þeir að reyna að vera umhverfisvænir.

Ég ætla að vera duglegur að bomba hérna inn myndum og pistlum þegar út er komið og kannski áður en ég fer verð ég búinn að sýna ykkur meira frá þessu gríðarlega fyrirtæki sem Ólympíuleikarnir og Ólympíumótin eru.

JBÓ

Of há stígvél!

2008-07-23T12:18:00.002+01:00

Þetta er fremur subbulegur djókur en engu að síður góður. Þennan netta brandara fékk ég í afmælisgjöf á dögunum, já 19. júlí takk fyrir. Læt hann bara fylgja hérna með, þið fyrirgefið og hafið gaman af.

Leitað læknisráða

Kona nokkur sem var óvenju smávaxin leitaði aðstoðar læknis því hún hafði í nokkurn tíma fundið fyrir miklum verkjum við kynfæri sín. Læknirinn bauð henni að leggjast á bekkinn og hóf rannsókn sína. Eftir smá atgang við helgustu vé konunnar sagði hann; „Svona, nú ætti þetta að vera í góðu lagi.“

Konan hélt heim og fann að hún hafði strax fengið meina sinna bót. Þessi smávaxna frú var svo ánægð næstu daga að hún ákvað að heimsækja lækninn og spyrja hann hvað hann hefði í raun tekið til bragðs þegar hún leitaði til hans fyrst.

„Nú, ég skar aðeins ofan af stígvélunum þínum!“

JBÓ

Stefnan var á eftirlaun Rúnar!

2008-07-11T17:04:00.002+01:00

Íþróttaáhugafólki Íslands til mikillar gleði var það eitt af fyrstu verkum nýrrar ritstjórnar Morgunblaðsins að losa sig við SOS. Kallinn sá arna stjórnaði lengi vel íþróttadeild Morgunblaðsins og hélt þar í skefjum öflugum náungum sem nú hafa tekið við stjórnartaumunum en það eru félagarnir Víðir Sigurðsson og Sigurður Elvar Þórólfsson. Strax á fyrsta degi sá maður breytingar til batnaðar og að nýju er ég orðinn annálaður aðdáandi Morgunblaðsins.

Rúnar Birgir Gíslason vinur minn á http://www.karfan.is/ spurði hér á síðustu leiktíð: „Hver er stefnan Sigmundur?“ Og þá átti Rúnar hér við þá ömurlegu umfjöllun sem körfuknattleikur hafði fengið. Það sem tók úr steininn var að MBL sendi ekki mann á uppseldan deildarleik Njarðvíkur og Keflavíkur í körfunni síðasta vetur og það var vægast sagt ótrúlegt að ekki hefði verið fjallað um leikinn í nema 3-4 línum!

Ætli karlinn sé ekki búinn að svara núna spurningu Rúnars, eða öllu heldur nýjir stjórnendur Moggans búnir að svara fyrir Sigmund. Árið er 2008 og það er ekki pláss fyrir risaeðlur á íþróttadeildum fjölmiðlanna, eflaust gerði Sigmundur margt á sínum ferli sem má telja honum til tekna en þessi lokasprettur hans var hrikalega slappur.

Ég og örugglega fleiri bindum miklar vonir við þá Víði og Sigurð Elvar og hingað til hafa þeir ekki valdið neinum vonbrigðum.

Bæ, Ásgeir í Tölvulistanum!

2008-07-09T11:02:00.003+01:00

Svo bregðast krosstré sem önnur tré, ja hérna! Nýir eigendur koma að rekstri Tölvulistans og hvað verður þá um Ásgeir kallinn???

„Hæ, Ásgeir í Tölvulistanum“ verður væntanlega „Bæ, Ásgeir í Tölvulistanum“

Fyrir okkur sem hlustum á útvarp þá er þetta kannski smávægilegur léttir því hann Ásgeir kallinn auglýsti eins og brjálæðingur og alltaf sama stefið; „Hæ, Ásgeir í Tölvulistanum“ og svo fylgdi kannski í kjölfarið einhver óskiljanleg ræða um ram, megabyte, backup og einhver læti.

Bæ Ásgeir í Tölvulistanum. Vertu velkominn á nýjan leik inn íslenskt atvinnulíf þegar kreppu lýkur og auglýsingaverð lækkar...

Eystri-Rangá gaf vel

2008-06-30T18:30:00.001+01:00

Þrír fræknir ofurhugar stóðu á sunnudag á bökkum aflahæstu ár sumarsins 2007 og renndu fyrir lax. Ekki var lengi að bíða uns fyrsti laxinn datt í hús en það var sjálfur Birnir Sær Björnsson sem setti í myndarlega 10 punda hrygnu. Reyndar varð það eini almennilegi fiskur ferðarinnar og honum var komið haganlega fyrir í kistu nálægt tökustað. Hrygnan verður svo notuð í hrognakreistingu en eins og glöggt má sjá á meðfylgjandi mynd leiddist ,,lefty” það ekki að fá jafn fagurskapaða skepnu á fluguna hjá sér.

Einn fiskur til viðbótar kom á land í ferðinni sem var ekki nema 3ja punda hrygna svo hollið kom ekki tómhent heim en áin gaf vel með þessari 10 punda hrygnu þó hún hafi ekki gefið mikið í þetta skipti.

Tímaeyðsla

2008-06-25T16:48:00.006+01:00

Ég og góðvinur minn örvhenti Birnir Sær Björnsson álpuðumst í bíó seint í gærkvöldi. Eftir rosalegan dag í pallasmíðum við Haustakur ákváðum við að verðlauna sjálfa okkur og splæsa í bíóferð þrátt fyrir síhækkandi miðaverð og kíghósta krónunnar. The Happening varð fyrir valinu en hún er eftir hinn „dularfulla“ M. Night Shyamalan.

Við lok myndarinnar litum við Birnir á hvern annan og hlógum „Skarphéðinshlátri“ yfir þessum gríðarlegu vonbrigðum. Þvílík og önnur eins vitleysutilraun til þess að taka undir með Leonardo DiCaprio og öðrum stórstjörnum sem hafa tekið málstað móður náttúru.

Shyamalan hefur tekið allmörg spor afturábak síðan hann gerði The Sixth Sense. Á eftir henni kom Unbreakable, fremur slöpp. Þar næst var svo Signs sem var þó betri en Unbreakable en næsta mynd var The Village og svo kom Lady in the Water og þarnæst The Happening. Þvílík og önnur eins rússíbanareið af vitleysu. Kannski er hann helvíti snjall höfundur og leikstjóri á Bandaríkjamarkaði en maðurinn er ekki bara fyrirsjáanlegur heldur skín það í gegn að hann þykist vera svo snjall að það kemur út eins og hann sé sjálfumglaður.

Leikurinn í myndinni fær seint óskarsverðlaun en skilaboðin eru: Hættum að misþyrma plánetunni okkar!

Á skalanum 1-10 er þetta mynd upp á einkuninna: 3

(finnst ég meira að segja vera nokkuð vægur með þessa einkunn)

Mín skilaboð til þeirra sem hugsa sér að kíkja á þessa mynd:

Verjum tímanum okkar betur!

Haglél á miðju sumri

2008-06-24T15:13:00.003+01:00

Um síðustu helgi skellti ég mér austur fyrir fjall og var viðstaddur 50 ára afmæli hjá Björgu móðursystur minni. Amma á bústað við Álftavatn og afmælisgestir hittust við Þrastarlund og nú átti að ganga í bústaðinn enda þessi leið gengin af fjölskyldumeðlimum frá ómunatíð. Lagt var af stað frá Reykjavík í blíðskaparveðri á laugardagsmorgni og rjómablíðan var ekki síðri þegar við komum í Þrastarlund. Fagnaðarfundir urðu á meðal fjölskyldumeðlima og loks var lagt af stað í gönguna.

Afmælisbarnið stjórnaði för en þegar um 10-15 mínútur voru liðnar af göngunni heyrðust þessar ógurlegu þrumur að ofan og á svipstundu varð allt kolmyrkvað. Um 30 manns litu til himins og nokkrum sekúndum síðar stóð hópurinn í miðri haglél. Allt um kring var heiðskýr himinn nema yfir þessum litla bletti. Það var undurfögur sjón en ótrúleg þó!

Þar sem við vorum aðeins búin með 1/3 af leiðinni þá blotnuðu sumarklæddir göngugarparnir í gegn. Einn göngumaðurinn hafði í góðviðrinu gert þau mistök að hafa með sér regnhlíf í ferðina og var honum vitaskuld kennt um ofankomuna.

Þegar hópurinn loks náði áfangastað voru margir orðnir þreyttir og gegnsósa eftir volkið. Afmælisbarnið hróflaði sig á hné og snéri sig á ökkla, börn með bláar varir þráðu ekkert heitar en að komast í bústaðinn og þegar þangað var komið… var ekki lengi að bíða eftir að haglinu slotaði.

Vitanlega var hart barist um þurrkarann í bústaðnum en veislugestir gerðust fáklæddir og gæddu sér á lambalærum og pylsum. Það verður seint sagt að Björg frænka sé ekki höfðingi heim að sækja og þetta verður fimmtugsafmæli sem lengi verður í minnum haft.

Til hamingju með afmæli frænka!

Jón Björn

Mynd 1: Björg og barnabörnin
Mynd 2: Mútta og Birna Rós

Barcelona að baki

2008-06-18T18:47:00.007+01:00

Þá er Barcelonaferðin okkar að baki og heppnaðist hún með miklum ágætum. Reyndar var veðrið ekkert til þess að hrópa húrra fyrir en það komu góðir dagar. Annars vorum við lítið að spá í veðrinu heldur tókst okkur alveg að týnast í borginni og njóta þess að vera til. Kom nokkuð á óvart hvað þetta helsta svæði borgarinnar er lítið. Maður var ekki lengi að labba athyglisverðustu staðina á enda.

Hinsvegar kom það á óvart að Spánverjarnir eru ekkert voðalega sleipir við eldavélarnar. Við áttum í stökustu vandræðum með að finna öflugan veitingastað sem gladdi svanga ferðalanga en sumt var ágætt.

Vitaskuld litum við á alla helstu staðina og það væri ekki úr vegi að kíkja aftur til Barcelona árið 2025 en þá stefna þeir að því að vera búnir með La Sagrada Familía, kirkjuna sem hefur verið í byggingu síðan fyrir 1900. Rosalega sérstök en flott kirkja.

Látum hér nokkrar laufléttar fylgja ásamt smá myndbroti af Magic Fountain sem er soldið flottur.

Kveðja,

Jón Björn

Fyrstu vikunni í nýja starfinu að ljúka

2008-06-06T17:33:00.003+01:00

Þá er fyrstu vinnuvikunni minni hjá Íþróttasambandi Fatlaðra við það að ljúka. Á morgun, laugardag, verður maður vappandi á milli tveggja móta á vegum sambandsins og svo er það bara Barcelona á mánudag.

Mér líst ofboðslega vel á nýja vinnustaðinn. Rétt hjá heimili mínu og í fyrsta sinn síðan í bæjarvinnunni gekk ég í vinnuna síðasta mánudag. Það var allt að því tímamótastund í mínu lífi þessi göngutúr. Vinnutíminn er líka flottur og hver veit nema mér takist að lækka forgjöfina í sumar á milli þess sem ég strýk bumbunni minni : )

Maður er orðinn soddann dúkur að einhverjir sáu sér þann kostinn vænstan að gera frétt um málið:

http://isi.is/?nwr_from_page=true&nwr_more=1537&ib_page=121&iw_language=is_IS

Ljúkum þessari vinnuviku með orðum Roy Rogers:

„Hér er ég kominn á áfangastað, Pési og þeir vita ekkert um það. Hér er planið það er ekki beisið, ég fer inn - þú umkringir pleisið."

Og munið að yougurt er skyrja!

(Kristinn R. Ólafsson)

Barcelona á mánudag

2008-06-05T16:22:00.003+01:00

Þá er komið að fyrstu fjölskylduferðinni okkar : )
Ég, Hilma og bumbubúinn förum til Barcelona á mánudag í langþráða afslöppun. Samkvæmt áreiðanlegum heimildum http://www.wunderground.com/ verður heiðskýrt og 28 stiga hiti á mánudeginum svo maður ætti að koma vel brunninn heim.

Ég hef einu sinni áður komið til Barcelona og það var yfir helgi. Við pabbi fórum að sjá Börsunga leika á sínum magnaða Nou Camp eða Nývangi eins og vinur minn Kristinn R. Ólafsson myndi kalla þetta skrímsli af knattspyrnuvelli.

Nöturleg niðurstaða við Þverárfjallsveg

2008-06-03T16:50:00.004+01:00

Íslenska þjóðin virðist ekki þreytast á vitleysunni í sjálfri sér. Nú þurftum við að fella hvítabjörn af nákvæmlega engri ástæðu en sú sem var opinberlega gefin var að hann hefði verið „hreyfanlegur“ og ef við eigum að halda áfram að fella dýr af þeim sökum þá endum við mannskepnan ein eftir á þessari jarðkringlu og nögum á okkur neglurnar uns við deyjum úr hor.

Hver tók þá ákvörðun að fella dýrið? „Ætli það hafi ekki verið yfirlögregluþjónninn," sagði Pétur.

Þetta svartletraða kemur fram á mbl.is í dag. Eigum við eitthvað að ræða þetta comment? Ætli það hafi ekki verið yfirlögregluþjónninn... ja hérna. Veit enginn neitt... er ekkert að frétta... hefur enginn tekið eftir því að hvítabjörninn er í bráðri útrýmingarhættu. Hefur engum dottið í hug að við búum á eyjum og eigum það á hættu að fá til okkar hvítabirni endrum og sinnum? Væri þá ekki nær að hafa deyfilyf eða svefnlyf í pílum sem hægt væri að skjóta í þessi dýr?

Þá er ekki til áætlun um á Íslandi hvernig eigi að bregðast við þegar hvítabirnir ganga á land! Það vantar viðbragðsáætlun við þessum gangi náttúrunnar! Halló, það er 2008. Hvað eru ráðamenn þjóðarinnar að baxa eða undirmenn þeirra í viðeigandi stofnunum - tja... við höfum nú gert upp á bak í fjármálum okkar svo það skal engan undra að okkur sé nákvæmlega sama um eitt stykki hvítabjörn, kannski einhverjir sem sjá pening í þessu.

Okkur er s.s. ekkert heilagt, sem er mjög miður! Ekki aðeins er vöntun hjá okkur á virðingu fyrir hverju öðru heldur almennt fyrir umhverfinu og því sem hugsanlega skiptir máli í einhverju samhengi.

Mynd: http://www.mbl.is/

Opinberun!

2008-05-26T17:07:00.002+01:00

Þegar á móti blæs eru það þeir staðföstu sem ganga frammi fyrir skjöldu og taka vindinn í fangið. Það blæs ekki byrlega hjá mínum mönnum í Njarðvík þessa dagana og nú þegar ég get sett allt hlutleysi til hliðar við starfslok mín hjá Víkurfréttum er ég hvergi banginn við að viðurkenna að ég sé Njarðvíkingur í húð og hár. Engum blöðum þarf um það að fletta að gengi körfuboltaliðsins var ekki eins og til var ætlast í vetur og um síðustu helgi lá fótboltalið UMFN 1-5 gegn Fjarðabyggð á Njarðvíkurvelli. Staðan er s.s. miður góð um þessar mundir hjá boltadeildum UMFN en við getum borið höfuð hátt í sundinu þar sem Erla Dögg er að gera magnaða hluti í lauginni.

Það er ekkert annað í boði en að breyta skeifunni í bros og vísir að skemmtilegri stuðningsmannasveit fótboltans gefur góð fyrirheit. Kapparnir mæta á Njarðvíkurleiki í skotapilsum með trommur og hvetja allan tímann, sannir Njarðvíkingar. Gaman væri ef körfuknattleiksáhugamenn sem venja komur sínar í Ljónagryfjuna myndu taka uppátæki piltanna fagnandi og fara að hafa gaman af hlutunum.

Áfram Njarðvík!

Mekka

2008-04-29T15:38:00.002+01:00

Svíþjóð, Stokkhólmur, Solna, í fyrramálið með Körfuknattleikssambandi Íslands. Einhvern tíma hef ég nú prufað það að fá mér í vörina og því verður spennandi að koma til Svíþjóðar, sjálft heimili General Snus, betur þekkt sem Gothiatek.

Hver veit nema ég taki nokkrar körfuboltamyndir í leiðinni. Það er aldrei að vita.

Jón Björn

Eini fréttamaðurinn á heimilinu

2008-03-24T02:32:00.003+01:00

Nú er það ljóst að það er ekki aðeins einn fréttamaður á heimili okkar. Hilma gerði um daginn harða atlögu að þeim starfstitli er hún náði þessari skemmtielgu mynd þar sem verið var að æfa sig úr þyrlu við vatnshólinn skammt frá heimili okkar í Skipholtinu. Skemmtilegar myndir og skemmtilegt augnablik sem hún fangaði þarna. Gott auga og efnilegur ljósmyndari hér á ferðinni.

Brátt rennur upp sú stund að Hilma verði eini fréttamaðurinn á heimilinu þar sem ég er búinn að fá nýja vinnu. Ég hætti í síðasta lagi í júníbyrjun hjá Víkurfréttum og fer þá til starfa hjá Íþróttasambandi fatlaðra. Þá verður Hilma eini fréttamaðurinn á heimilinu : )

Jón Björn

Sigur andans

2008-03-05T01:00:00.002+01:00

Mig langar til þess að óska vini mínum til hamingju með áfangann. Rúnar Ingi Erlingsson var hetja Breiðabliks í 1. deildinni í körfubolta er hann gerði sigurstig liðsins úr vítaskotum gegn Val en með sigrinum eru Blikar komnir upp í úrvalsdeild. Rúnar sýndi mikinn karakter gegn Val því laugardeginum fyrir þennan leik hafði hann lent í miður skemmtilegri lífsreynslu.

Á laugardeginum var Rúnar að keppa með drengjaflokki í Breiðablik og fékk tækifæri til að knýja fram framlengingu með þremur vítaskotum en hann brenndi af síðasta vítaskotinu og keppnismaðurinn tók það inn á sig. Gegn Valsmönnum í meistaraflokki aðeins þremur dögum síðar var hann kominn í svipuð spor. Rúnar átti tvö vítaskot þegar 7 sekúndur voru eftir af leiknum og setti þau bæði niður sem reyndust sigurstig leiksins. Stór sigur og stór dagur fyrir Blika og stór stund hjá Rúnari sem lét ekki vítaskotin örlagaríku í drengjaflokki hafa áhrif á sig í meistaraflokki og sannaði að hann er einn efnilegast körfuknattleiksmaður þjóðarinnar og ég get ekki beðið eftir að sjá hann spila í efstu deild.

Til hamingju með þetta félagi!

Ég kannski bæti því við að Rúnar var með 39 stiga hita í leiknum!!!

Darri besti minn

2008-03-01T11:22:00.003+01:00

Eins og þið sem lesið þessa síðu vitið á ég tvo yndislega bróðursyni sem okkur Jóni mínum er mikið annt um. Tilefni þess að ég læt loksins verða að því að setja færslu hingað inn er hinn prýðispilturinn Þórhallur Darri. Ég ætla að segja ykkur aðeins frá honum.

Hann verður 10 ára 13. apríl n.k. Hann býr í Hvassaleiti og er í Hvassaleitisskóla. Darri minn er einstaklega einlægur og ljúfur drengur um leið og hann er mega töffari og sjúklega sætur. Hann segir okkur Jóni Birni oft að hann elski okkur og hvað honum finnist við yndisleg og auðvitað segjum við sömu orðin við hann þó Mr. J.B. hafi nú þurft að taka á stóra sínum.

Þórhallur Darri las um fjölskyldu sem hafði orðið fyrir því óláni að missa allar eigur sínar í eldsvoða með tilheyrandi sorg. Darri sá aumann á tveimur piltum á hans aldri og gaf þeim allar jólagjafirnar sínar!!

Þegar Fréttablaðið óskaði eftir ábendingum til samfélagsverðlauna 2008 sendi vinkona Rakelar, mágkonu minnar, inn söguna um Darra og var hann þess vegna tilnefndur til Hvunndagshetju 2008 hjá Fréttablaðinu - geri aðrir 9 ára piltar betur.

Síðasta þriðjudag fórum við 10 saman, sem öllum þykir mikið vænt um Darra, á hátíðlega samkomu í Þjóðmenningarhúsinu þar sem mikið var af öllu því sem fínt þykir í okkar samfélagi. Þar var forsetinn, pólitíkusar, framafólk, mikið af fullorðnu fólki, léttvín og pinnamatur. Darri varð mjög taugaóstyrkur, með hnút í maganum og rauða flekki í andlitinu gekk hann fram í sviðsljósið og tók á móti stóru innrömmuðu viðurkenningarskjali og fallegum blómvendi.

Verðlaunin Hvunndagstja 2008 hlutu hjón af Kjalarnesi sem hafa tekið börn í tímabundin fóstur síðustu 18 ár og alið upp mikið af íslenskum börnum sem ekki hafa búið við barnvænleg skilyrði. Ekki þótti hjónunum nóg um hvunndagsverðlaunin og héldu áfram uppteknum hætti í hvunndagshetjuskap og gáfu Darra Evrópuferð fyrir tvo sem þau hlutu að verðlaunum. Drengurinn var að vonum einstaklega ánægður með þetta allt saman og lærði svo sannarlega að það borgar sig að hugsa vel um náungann, vera gjafmildur og góðhjartaður.

Elsku Darri þú ert frábærlega æðislegur! Við erum sjúklega stolt af þér.

Hér fyrir neðan, í eldri færslu, sjáiði mynd af kauða þar sem hann er í essinu sínu í sundlaugargarði á Spáni.

Hilma

Ágengar álftir

2008-02-27T13:21:00.003+01:00

Fuglarnir voru aðgangsharðir við Lækinn í Hafnarfirði um síðustu helgi enda úti kalt og fátt um stingandi strá upp úr snjónum. Þessi unga dama á myndinni kom vopnuð brauðpoka frá Myllunni og þótti víst eitthvað sein til að koma brauðsneiðinni í umferð hjá fuglunum svo þeir bara færðu sig nær. Hugsanlega fóru þeir aðeins of nálægt því þeir hræddu líftórunu úr þessu litla vetrarklædda manndýri sem örskotsstundu síðar henti brauðsneiðinni í heilu lagi upp í álftina sem er komin alveg upp að henni. Þetta var skemmtilegt móment en þarna var ég á flakkinu fyrir Víkurfréttir í Hafnarfirði með myndavélina að vopni.

Jón Björn

Út í sólina

2008-02-20T12:40:00.003+01:00

Þegar snjónum kyngdi niður í gær gat ég ekki annað en látið mig dreyma um sumar og sól. Væri nú ekki yndislegt að vera staddur á einhverri hitabeltisströndinni að sóla sig í bak og fyrir? Vera jafn áhyggjulaus og þessir kátu smjattpattar á meðfylgjandi myndum. Þeir þurfa hvorki sól né strönd til að að brúnin lyftist því ef það snjóar eru þessir kappar, Tristan og Darri, mættir í gallann og út að rúlla upp Snæfinni eða framkvæma önnur strákaprik.

Miðað við tíðarfarið liggur við að maður gerist dyggur stuðningsmaður hnattrænnar hlýnunnar. Öll él styttir þó upp um síðir og brátt verður maður farinn að reima á sig golfskóna eða bóna bílinn. Þangað til lætur maður sér það lynda að garfa í ferðabæklingum sem streyma nú inn um bréfalúgurnar.

Já, og áfram Liverpool!

Jón Björn

Gripnir glóðvolgir

2008-02-11T00:42:00.000+01:00

Vinnuveitandi minn er kunnur golfari og sé tekið mið af meðfylgjandi myndbroti þá er ég nokkuð feginn að við höfum aldrei svona myndsímafundi - þá gæti margt komið upp úr dúrnum þar sem manni leiðist nú ekkert að taka í kylfu!

Dýrasti sleikjó í heimi!

2008-02-06T23:52:00.000+01:00

Öskudagur að kveldi kominn og það ekki að kostnaðarlausu. Á meðan börnin streymdu inn á Fasteignasöluna Höfða í Hafnarfirði til þess að syngja fyrir nammi ágerðist löngun mín í sælgætið. Loks þegar engin börn voru á kreiki þá sætti ég lagi. Víkurfréttir í Hafnarfirði deila húsi með Höfða sem hélt úti körfu fullri af karamellusleikipinnum.

Ég nældi mér í eitt stykki og var þar á ferðinni hreint karamelludúndur. Ég saug og smjattaði og var að baxa við tölvuna þegar tungan á mér rakst utan í aðra framtönnina í hamaganginum og viti menn... ég fann að gamla framtannarfyllingin var horfin!

Saga framtanna minna er þyrnum stráð og hefst að mig minnir að Holtsgötu 17 þegar mig dreymdi um að eignast hjólabretti. Ég varð að láta mér plastbíl systur minnar lynda og þeir eru ekki ákjósanlegir sem hjólabretti. Afleiðingin var brotin framtönn og nokkrum sinnum eftir það braut ég í mér framtennurnar, við að bíta pinna úr epli, datt á svelli og nartaði glæsilega í steypuvegg þegar ég reyndi að klifra yfir hann. Síðast en ekki síst var ég eitt sumarið á fótboltaæfingu og skutlaði mér á stöng með þeim afleiðingum að taugin í annarri tönninni drapst.

Þetta síðasta framtannaafrek mitt í dag er það minnst karlmannlegasta af þeim öllum. Það er hollt og gott að borða epli en að týna broti úr framtönn í karamellusleikjó er bæði niðurlægjandi og dýrt, við skulum segja tæpar 14 þúsund krónur.

Jón Björn

Vodkaendur

2008-01-23T14:36:00.000+01:00

Meira að segja endurnar við Reykjavíkurtjörn hafa kastað inn handklæðinu og snúið sér að bokkunni. Gengi íslenska handboltalandsliðsins hefur verið hörmulegt á EM í Noregi og þjóðin er gersamlega farin á hliðina í þessum efnum rétt eins og í fjármálageiranum. Borgin sprungin, framsókn í sífelldri rénun og Fisher farinn á feðranna fund. Lítið um jákvæðar fréttir þessa dagana en öll él styttir upp um síðir og þá er aldrei að vita nema endurnar á tjörninni sjái sólina og láti renna af sér.

Of miklar kröfur: Heyskita handboltalandsliðsins

2008-01-20T19:24:00.000+01:00

Medalíudraumar íslenska handknattleikslandsliðsins eru endanlega úr sögunni eftir risastórt tap gegn Frökkum á EM í Noregi í dag. Menn voru örugglega einum of kokhraustir áður en þeir héldu til Þrándheims. Svona svipað kokhraustir og ég var í sumar þegar ég hélt virkilega að ég gæti klárað baðherbergið okkar á tveimur vikum. Það var grátlegt að sjá okkar menn gersamlega tekna í bakaríið af franska liðinu sem virtist ekki hafa neitt fyrir sigrinum. Man ekki til þess að hafa séð svitadropa á leikmanni Frakklands.

Af boltagreinunum þremur, fóbolta, körfubolta og handbolta er handbolti minnsta íþróttagreinin á heimsvísu og sú verst launaðasta. Það er ekkert launungarmál. Handboltinn og gengi karlalandsliðsins er Íslendingum mikið hjartans mál og jafnan eru vonir okkar um gott gengi á stórmótum óraunhæfar. EM og HM eru sama keppnin. Bestu handknattleikslið heims koma frá Evrópu og á HM bætast við Ástralía og Katar og nokkur önnur lönd sem eiga ekki möguleika á mótinu.

Sjálfur gerðist ég sekur um að vonast eftir medalíu á EM í handboltanum þetta árið en nú hefur manni verið gróflega kippt niður á jörðina með skelfilegri frammistöðu liðsins í riðlakeppninni. Frammistaðan er svo slök að þulir RÚV hafa ekki einu sinni þorað að skamma landsliðið fyrir skammarlega lélega frammistöðu. Annars getum við öll sjálfum okkur um kennt fyrir að gera svona miklar væntingar til þeirra. Ég held að Alfreð og lærisveinar hefðu bara átt að segja að þeir væru ánægðir með að komast í milliriðla, allt annað væri bónus.

Svo bíður maður bara með öndina í hálsinum til að sjá hversu stórt Ísland tapar fyrir næstu smáþjóð í fótbolta karla. Gætum hugsanlega unnið Vatikanið þar sem við erum búnir að tapa fyrir Lichtenstein.

Nú í febrúar verður svo dregið í riðla á EM b-þjóða í körfunni en körfuboltalandslið karla er eina landsliðið sem hefur ekki valdið vonbrigðum að undanförnu. Minnugur glæsisigursins gegn Georgíu hér á haustmánuðum 2007 í Laugardalshöll.

Tjúnum aðeins niður kröfurnar okkar og reynum að hafa gaman af þessu!

Jón Björn

Forðist Ben Affleck

2008-01-18T21:04:00.000+01:00

Var heima í gær og í dag í smá flensuskít og þá er fátt betra en að vera með fullan flakkara af ýmsu skemmtilegu. Davíði Ingi (fyrrverandi vinur minn eftir þetta) var svo góður að láta inn á flakkarann hjá mér kvikmyndina Man About Town með Ben Affleck í aðalhlutverki.

Ben Affleck hefur einu sinni leikið í góðri kvikmynd og það var ekki Man About Town. Eina góða myndin sem piltur hefur leikið í er með félaga sínum Matt Damon í myndinni Good Will Hunting en þá eru þeir félagar leiddir áfram af góðum leik Robin Williams.

Man About Town er með lakari myndum sem ég hef séð og nú hef ég séð ýmsan viðbjóðinn á borð við National Treasure myndirnar með Nicholas Cage eða bara allt með Nicholas Cage. Hann og Ben Affleck eru ámóta slakir leikarar. Hvernig í ósköpunum gátu þeir orðið vinsælir? Bara hér heima á klakanum get ég bent á í það minnsta 15 miklu betri leikara en Ben Affleck og Nicholas Cage.

Myndin sjálf er hæg og illa leikin og ef ekki hefði verið fyrir John Cleese inn á milli þá hefði ég eflaust slökkt mun fyrr á þessu bulli sem fjallar um umboðsmann fyrir handritshöfunda í Hollywood sem fer í einhverskonar innhverfa íhugun eða hvað sem þetta er nú kallað.

Útgangspunkturinn er s.s. þessi: Forðist allar myndir með Ben Afflec, alveg sama hversu heillandi coverið á myndinni eða treilerarnir að henni geta verið. Hann er gersamlega ónýtur leikari og með ofmetnari mönnum heims.

Góðar stundir

Hélt ég hefði hoppað hærra!

2008-01-18T20:07:00.000+01:00

Já gleðilegt ár öllsömul. Þetta er önnur tveggja mynda sem var í jólakortinu okkar Hilmu. Skemmtileg mynd sem ljósmyndarinn Erlingur Ó. Aðalsteinsson tók á brúðkaupsdaginn okkar þann 6. október síðastilinn. Ég hef lengi haldið að ég væri ótrúlegur íþróttamaður en þessi mynd afsannar þær hugmyndir mínar. Mig minnir að ég hafi haft mig til flugs á þessari mynd og svifið um himinhvolfin eins og tígulegur örn í leit að bráð. Annað kom þó á daginn, ég rétt lyftist af göngustígnum þarna og er ekkert voðalega íþróttamansslegur. Ætli það sé ekki ein af ástæðunum fyrir því að ég sé blaðamaður ??? : )

Annars er allt gott að frétta úr Skipholti 51 og fiskarnir okkar gera fátt annað en fitna, við förum brátt að sleppa þeim í Reykjavíkurtjörn þessum elskum. Verða brátt flokkaðir sem spendýr ef vöxturinn heldur sér!

Jón Björn

Nokkrar myndir

2007-10-22T17:07:00.000+01:00

Hér koma nokkrar í viðbót frá deginum okkar sem jafnan er enn þungamiðjan í flestum okkar samtölum. Þökkum innilega fyrir allar fallegu kveðjurnar.

Jón Björn og Hilma.

Grjónagangan

2007-10-11T13:27:00.000+01:00

Jæja þá getum við loksins birt smá bút frá stóra deginum okkar en í þessu myndbroti eru Frú Hilma og Hr. Jón að ganga út úr Ytri-Njarðvíkurkirkju í miklu grjónaregni.

Við fórum svo í smá hunangstungl (honeymoon) upp í Álftavík og það var bara slappað af með glás af sælgæti og DVD myndum.

Nánar af merkisdeginum síðar... : )

Jón Björn og Hilma

Videoprufa, test 123, 123

2007-10-10T17:44:00.000+01:00

Smá videoprufa hérna. Sýnið þolinmæði : )
Þetta er nú ekki merkilegur bútur en hann er engu að síður úr brúðkaupinu.
Draumadeginum verður gerð nánari skil síðar.
Jón Björn

Steggjun og gæsun lokið

2007-09-17T10:43:00.000+01:00

Steggjun og gæsun um síðustu helgi. Magnað fjör, töluverðir timburmenn á sunnudeginum en það kom ekki að sök, við erum á lífi. Mikið óskaplega fannst mér gaman af því að sjá hann Jenna minn í steggjuninni. Kallinum var bara flogið beint frá Köben og í steggjunina og svo fór hann aftur út í morgun. Strákarnir komu og vöktu mig með látum og þar sá ég Jensinn og fannst ekkert sjálfsagðara, áttaði mig svo á því síðar um daginn að honum hefði verið flogið til okkar. Mér fannst bara eins og hann ætti enn heima hérna : )

Þökkum kærlega fyrir okkur, laugardagurinn var frábær.
Jón Björn og Hilma

Enn ein sápan og ég sit fastur

2007-08-28T15:54:00.000+01:00

Þá hefur Kananum enn eina ferðina tekist að líma mig við skjáinn. Að þessu sinni er það þátturinn Friday Night Lights og ég féll í stafi áður en fyrsti þátturinn var sýndur. Það þurfti ekki nema einn trailer og búmm... ég var húkkaður.

Þættirnir fjalla um ruðningslið í miðskóla í Texas í Bandaríkjunum þar sem áhuginn á þessari stragedíuíþrótt er hvað mestur. Allt svona efni, þættir, bíómyndir og heimildamyndir um íþróttir vekja endalaust áhuga minn og það styttist bráðlega í það, að vanda, að Hilma geti ekki rifið sig frá þessum þáttum. Mér tekst nefninlega furðu oft að smita hana af einhverri svona þvælu.

Vonandi verður þetta stutt sería annars verð ég að henda sjónvarpinu.

Boot Camp Hell Weekend

2007-08-20T23:28:00.000+01:00

Erum að horfa á Boot Camp Hellweekend á Skjá einum, við erum bæði í Boot Camp en æfingarnar sem fólkið er að gera í sjónvarpinu eru hrein kvöl og pína. Mæli samt eindregið með Boot Camp, erfiðar æfingar og kveikir vel í keppnisskapinu hjá manni. Verst hvað maður er illa leikinn af harðsperrum eftir tímana : )

Fitt og flottur í sútið 6. okt hehe

Beðið eftir steypibaðinu

2007-08-16T17:09:00.000+01:00

Við bíðum þess enn að sturtan okkar verði tengd og henni komið í gagnið. Í augnablikinu ganga allar framkvæmdir voðalega hægt hjá okkur í íbúðinni og ef við viljum komast í steypibað þá verðum við að gjöra og svo vel að skella okkur í ræktina eða í sund og hana nú. Sturtuleysið yrði þó aldrei til þess að undirritaður kæmist í form...er það?

Annars vorum við að koma heim frá Köben þar sem við dvöldum hjá Sigrúnu og Jenna, hittum aðeins á Jórunni Björk og Elísu og nutum bara lífsins út í ystu æsar. Magnað að vera þarna niður á Íslandsbryggju, ég tapaði mér alveg á einhverju sjóstökkbretti sem var þarna í höfninni, stutt í barnið í manni.

Ef einhver kann að setja upp sturtu og tengja nippihné við pp rör í kvarttommu þá er sá hinn sami boðinn í kaffi til okkar : )

Nú bara bíðum við uns píparinn okkar hringir með nokkurra mínútna fyrirvara og kemur og græjar málið, þangað til verðum við að sturta okkur í ræktinni, ekki málið.

Klósettið komið í gang, allt að gerast!

2007-07-14T20:22:00.000+01:00

Guð almáttugur á það til að vera smá erfiður því síðustu vikur hefur hann látið gula kvikindið skína af öllum krafti á meðan við húkum inni í íbúðinni okkar að gera hana klára. Ég man vart eftir annarri eins veðurblíðuhrynu og það er búið að vera nokkuð grátbroslegur fílingur í okkur Hilmu. Við byrjum bæði að vinna aftur á mánudag eftir tveggja vikna sumarfrí og þá standsetjum við heimilið meðfram vinnunni, þetta er að verða voðalega kósý hjá okkur.

Salernið er komið í fullan sving en það var vígt með mikilli athöfn á fimmtudagskvöld. Á meðfylgjandi myndum sést á einni þeirra hve ánægð Hilma var með nýja klósettið sitt. Fyrsta nóttin okkar í nýju íbúðinni var s.s. á fimmtudagsnótt en steypiböð fara yfirleitt fram í Laugardalslauginn. Stefnt er að því að sturtan verði komin í gagnið ekki síðar en næsta fimmtudag. Hvern hefði grunað að yfirhalning á tæplega 5 fermetra baðherbergi myndi taka jafn langan tíma?

Annars er þetta allt að koma hjá okkur enda höfum við notið liðsinnis góðra pilta og meyja, allir boðnir og búnir til þess að rétta fram hjálparhönd sem hefur verið ómetanlegt.

Nú er sumarfríið að baki og blákaldur raunveruleikinn með heiðskírum himni bíður manns á mánudag.

Góðar stundir
Jón Björn

Flutningar með Ljótu hálfvitunum

2007-07-10T23:20:00.000+01:00

Þá er búslóðin öll komin inn í Skipholt 51 en við erum ekki enn flutt inn ef svo má að orði komast. Við rifum allt út af baðherberginu og það hefur dregist nokkuð að koma salerninu í lag en engu að síður hefur öflug sveit vaskra einstaklinga verið dugleg við að hjálpa okkur. Nú er búið að flísaleggja gólfið á baðherberginu og vonandi á morgun, miðvikudag, verður salernið orðið starfhæft og vaskurinn og sturtan komin í gír um eða eftir helgi. Þessa stundina er því nokkurs konar óreiðuástand á okkur Hilmu og meðfram framkvæmdunum á baðinu er nostrað við að koma hlutunum hægt og bítandi á sinn stað. Stefnum að því að vera með innflutningsgigg þarnæstu helgi og vonandi gengur það allt eftir.

Annað og ótengt flutningum...Ljótu hálfvitarnir... diskur sem verður að komast í heimilssafnið. Mæli persónulega með laginu Ást, ást, ást. Diskurinn er algjör snilld, engin tilgerðarleg hljóðblöndunu eða Einar Bárðar í bakgrunninum að hæpa upp allan pakkan. Bara nokkrir íslenskir graðnaglar að Norðan sem skipa sveitna og það sem betra er, nokkrir meðlimanna voru í hinni stórgóðu sveit Innvortis sem íslenskaði svo eftirminnilega More than a feeling með bandinu Boston sem gerði góða hluti um svipað leyti og Michael Bolton var kyntákn.

Fleira var það ekki að sinni en endilega vindið ykkur út í næstu hljómplötuverslun og nælið ykkur í eintak af Ljótu hálfvitunum.

Staðið í ströngu

2007-06-24T12:57:00.000+01:00

Ég ætlaði vart að hafa það að skrá mig inn á síðuna því langt er um liðið síðan við Hilma blogguðum hérna síðast. Við vildum bara endilega láta ykkur vita að nú stöndum við sveitt í flutningum, eða þannig. Erum á fullu við að koma öllu okkar dótaríi niður í kassa og svo fáum við íbúðina í Skipholti afhenta 1. júlí. Þetta verða fróðlegir flutningar þar sem við erum að flytja upp á fjórðu hæð og engin er lyftan. Ekki súpa hveljur því við leigjum okkur skotbómu og ætlum ekki að biðja neitt af ykkur um hjálp, hehe. Bjóðum ykkur bara í innflutningspartý þegar þar að kemur.
Næsta færsla verður væntanlega úr nýju íbúðinni.

Jón Björn

Aðskilnaður við Miðborgina

2007-04-20T23:28:00.000+01:00

Gleðilegt sumar kæru vinir og takk fyrir veturinn.

Þeir atburðir sem hafa átt sér stað í Miðborginni okkar fögru á tímamótum vetur og sumars 2007 eru hreint út sagt voðalegir. Við Jón björn höfum notið þeirra forréttinda að búa með Miðborginni síðustu 6 ár og liðið alveg hreint yndislega. Mér dettur helst í hug að borgin sé í uppnámi vegna væntanlegra flutninga okkar, en við biðjum hana um að örvænta ekki þar sem við verðum skammt undan. Nú verður bara spennandi að sjá hvað ákveðið verður að gera á horninu fræga. Mér finnst nú í lagi að reyna að halda upprunalegri mynd hornsins en yrði ekkert svakalega sár þó Pravda húsið verði öðruvísi á að líta eftir uppbyggingu.

En nú er búið að selja Skólavörðustígsíbúðina. LOKSINS. Eins og mér finnst íbúðin falleg og gott að búa hér tók heila 2 mánuði að selja hana. Skil það ekki ennþá. Við vorum búin að halda íbúðinni spikk & span upp á hvern einasta dag í þessa tvo mánuði og alltaf að sýna með bros á vör. Nú er sú tíð liðinn og tiltekt og pökkun tekur við. Við byrjum á öllu slíka þegar við komum heim frá Spáni.

Við skötuhjúin erum nefnilega að fara til Spánar með allri fjölskyldunni. Pabbi kallinn ætlar að halda upp á fimmtugsafmælið í sólinni og þar sem hann er einstaklega vinæll maður ætlar stórfjölskyldan að elta hann út í hitann. Ég verð allavega á bikiníinu í næstu viku rétt eins og Betty boop á myndinni hér til hliðar.

Eitt að lokum. Hún Kamilla mín á afmæli á sunnudaginn. Innilega til hamingju með daginn mín kæra. Njóttu!

Ást og friður á Dalvík sem og víðar
Hilma

Oprah Winfrey á næstu fiskidögum?

2007-04-15T21:06:00.000+01:00

Við Hilma urðum þess heiðurs aðnjótandi síðasta sumar að fara á fiskidaga á Dalvík en það er ein skemmtilegasta bæjarhátíð sem ég hef farið á. Þar gúffuðum við í okkur alls kyns fiskréttum ásamt bjór og öðrum áfengum drykkjum og skemmtum okkur konunglega alla helgina. Stefnan er að fara aftur á fiskidaga og við viljum endilega að sem flestir fjölmenni með okkur.

Núna rétt í þessu var sunnudagsviðtalinu í Kastljósinu að ljúka en það var viðtal við helsta skipuleggjanda fiskidaganna á Dalvík þar sem hann tjáði alþjóð að stefnt væri að því að fá Opruh Winfrey á næstu fiskidaga. Magnað! Eða þannig.

Það síðasta sem fiskidagarnir á Húsavík þurfa á að halda er risanafn á borð við Opruh Winfrey til þess að koma og stela allri þrumunni úr hátíðinni. Það sem ég varð ástfanginn af á fiskidögum var þessi nett kærulausa stemmning þar sem maður gat bankað upp á hjá fólki og fengið sér súpu. Ef Oprah mætir á fiskidagana þá verður engin súpa, allir súpugerðarmenn á Dalvík sem vert er að nefna verða uppteknir við að hafa sig fína og gera sig klára til að fara og sjá Opruh og þá verðum við blóðsugurnar út undan, engin frí súpa, bara haugur af fólki niðri á bryggju að bíða eftir Opruh til þess að sjá hvort hún sé grönn eða feit á bryggjunni.

Ég vil endilega hafa bara suðsvartan almúgan eins og okkur á fiskidögum, Rúnni Júll á sviðinu og Papar um kvöldið og gallabuxur og lopapeysur. Einfalt, fljótlegt og gott og laust við allt Kanaglamúr.

Lifi fiskidagarnir!

Heima yfir páskahátíðina

2007-04-04T12:26:00.000+01:00

Heima er best stendur einhvers staðar ritað og þannig verður málum háttað hjá okkur Hilmu yfir páskahátíðina. Við ætlum okkur bara að rúnta Reykjanesbrautinni millum 101 og 260 og hafa það náðugt. Að vísu þarf ég að vinna eitthvað um helgina en það er ekki 100 í hættunni svo maður getur nú örugglega eitthvað sofið út.

Fyrir ykkur hin sem eruð jafn ferðalagaglöð og við eða þannig, þá verður heitt á könnunni hjá okkur um helgina en ég stórefa það að þessi súkkulaðirisi mér við hlið á myndinni verði í sama formi þegar þið lítið við.

Gleðilega páska,
Jón Björn og Hilma